Elordadaǵy Esil ózenine 200 myńǵa jýyq balyq jiberiledi

ASTANA. QazAqparat – Erteń, 7 qazanda Astananyń Qorshaǵan ortany qorǵaý jáne tabıǵatty paıdalaný basqarmasy Esil ózenine 200 myńdaı balyq jiberedi, dep habarlaıdy QazAqparat qala ákimdiginiń resmı saıtyna silteme jasap.

Buqtyrma ýyldyryq shashý-ósirý sharýashylyǵynyń ınkýbatsııalyq tsehtarynan: 100 myń aq amýr jáne 96 myńnan astam tuqy balyǵyn ózenge shyǵarý josparlanyp otyr.

«Aq amýrdy kóbinese «shóp tuqy» nemese «tabıǵı melıorator» dep ataıdy. Ol sazan tuqymdasyna jatady. Joǵary ósý jyldamdyǵymen erekshelenedi – jyl saıyn shamamen 10 sm. Іri balyqtardyń uzyndyǵy – 1 m 20 sm, salmaǵy – 30-32 kg jetedi.

Aq amýr – shópqorekti, ol sý jáne jer ósimdikterimen qorektenedi. Eger toǵanda shóp jetkiliksiz bolsa, ony sýǵa arnaıy laqtyrady. Jas balyqtar qan qurttarymen jáne shaıan tárizdilermen qorektenedi, al jetilgennen keıin ósimdik taǵamyna aýysady.

Tuqy – eti dámdi bolǵandyqtan, tutynýshylardyń joǵary suranysyna ıe tuşy sý balyǵy. Bul balyq kóp qorektenedi jáne tez ósedi. Olar qamys ósindileri, balyqtar men baqalardyń ýyldyryǵy, qurttar, shaıan tárizdiler jáne jándikterdi qorek etedi. Taýarlyq tuqy salmaǵy – 1250-1500 g. Uzyndyǵy – 39-41 sm. Ol taza sýda da, tuşy sýda da ómir súre alady», - dedi basqarmadan.

Uıymdastyrýshylardyń aıtýynsha, balyqtar ózenge arnaıy jabdyqtalǵan avtomobıldermen jetkiziledi.

Balyq jiberý protsesi Astana ákimdigi men máslıhaty, Esil oblysaralyq balyq sharýashylyǵy basseındik ınspektsııasy, sý resýrstaryn paıdalanýdy retteý jáne qorǵaý jónindegi Esil basseındik ınspektsııasy, Astana qalasy boıynsha Ekologııa departamenti jáne «Qazaqrybhoz» balyqshylar qoǵamdyq birlestikteriniń respýblıkalyq qaýymdastyǵy ókilderiniń komıssııalyq quramynyń baqylaýymen júzege asyrylady.

Foto:elorda.info