Elordadaǵy Esil ózeninde balyq qyrylǵan joq - mınıstrlik

NUR-SULTAN. QazAqparat – Keshe áleýmettik jelide Esil ózeniniń «Serýen» jaıaý júrginshiler kópiri mańynda balyq jınalyp qalǵany týraly aqparat jarııalandy. Osyǵan baılanysty Ekologııa, geologııa jəne tabıǵı resýrstar mınıstrligi málimet taratty, dep habarlaıdy QazAqparat.

Vedomstvonyń málimetinshe, sol kúni «Aqmola oblystyq orman sharýashylyǵy jáne janýarlar dúnıesi aımaqtyq ınspektsııasy» RMM Astana ınspektsııasy bóliminiń ınspektorlary Nur-Sultan qalasy ákimdiginiń «JasNur» ÓShK ókilderimen birlesip, sý aıdynyn tekserip shyqqan.

Sholyp shyqqan qyzmetshiler aıtylǵan orynnan jas balyqtyń jınalǵanyn baıqaǵan, biraq óli balyq tabylmady.

2020 jyldyń 13 mamyrynda «Aqmola oblystyq orman sharýashylyǵy jáne janýarlar dúnıesi aımaqtyq ınspektsııasy» RMM Astana ınspektsııasy bóliminiń ınspektorlary Nur-Sultan qalasy ákimdiginiń «JasNur» ÓShK ókilderimen, sonymen qatar «Balyq sharýashylyǵy ǵylymı-óndiristik ortalyǵy» JShS soltústik fılıalymen birlesip Esil ózeni akvatorııasynyń jaǵalaýy men jaıaý júrginshiler kópirine tekserý júrgizdi. Balyq jınalyp qalǵan oryndarda ólgen balyq tabylmady, sonymen qatar, sýdyń zııandy zattarmen lastanǵany da baıqalmady. Nur-Sultan qalasy ekologııa departamenti sýdan synama aldy.

Esil ózeniniń ıhtıofaýnasyna monıtorıng jasaý jalǵasyp jatyr.

Aıta ketsek, balyqtar ýyldyryq shashyp, kóbeıip jatqanyna baılanysty 20 sáýir men 20 mamyr aralyǵynda Esil ózeni men oǵan quıatyn salalarda balyq aýlaýǵa tyıym salynǵan.