Elordadaǵy emhanada kitaphana uıymdastyryldy

NUR-SULTAN. QazAqparat – Nur-Sultan qalasyndaǵy №8 emhanada turǵyndar úshin kitaphana jumys istep jatyr, dep habarlaıdy QazAqparat elorda ákimdiginiń saıtyna silteme jasap.

Shilde aıynyń basynda №8 qalalyq emhanada «Kitap oqy, oqyrman!» aktsııasy bastaldy. Jobaǵa bastamashylyq etken – «Ortalyqtandyrylǵan kitaphanalar júıesi» KMM. Basty maqsat – kitap oqýǵa degen qyzyǵýshylyqty arttyrý jáne nasıhattaý.

«Aktsııa aıasynda Nur-Sultan qalasynyń ortalyqtandyrylǵan kitaphana júıesimen birlesip BookCrossing sóreleri bar kitap shkafyn uıymdastyrdyq. Ártúrli jastaǵy balalarǵa arnalǵan alýan túrli taqyrypty qamtıtyn kitaptar syıǵa tartyldy, sondyqtan kishkentaı oqyrmandar kitaphana qorynan mindetti túrde ózderine unaıtyn kitap taba alady», - dedi №8 qalalyq emhananyń ońaltý bóliminiń aǵa medbıkesi Madına Qaljanova.

Kitaphanashylar ádebıettiń birneshe toptamasyn daıyndaǵan. Olardyń arasynda detektıvter, áıelderge arnalǵan romandar, fantastıka, klassıkterdiń shyǵarmalary jáne óleńder de bar. Bul – elorda turǵyndary syıǵa tartqan kitaptar. Sóreler oqyrmandardyń kitap oqýǵa degen qyzyǵýshylyǵyn arttyrý maqsatynda únemi ártúrli ádebıettermen tolyqtyrylyp otyrady.

Foto: www.gov.kz