Elordadaǵy balabaqshalarda tamaqtandyrý tarıfine qatysty usynys engizilmek
«Biryńǵaı as máziri ázirlendi. Buǵan deıin ár balabaqshada óziniń as máziri bolatyn, qazir qala boıynsha biryńǵaı boldy. Jalpy, 96 mektepte 196 myńnan astam oqýshy bilim alyp jatyr. Onyń ishinde bastaýysh synyp oqýshylary 100 paıyz tegin ystyq tamaqpen qamtylǵan», - dedi Q. Senǵazyev qalalyq máslıhattaǵy turaqty komıssııanyń otyrysynda.
Onyń aıtýynsha, qazirgi kezde bir balany tamaqtandyrýdyń quny kúnine 449 teńge. Osy saladaǵy sapany baqylaýdy kúsheıtý úshin ár mektepte tıisti komıssııa quryldy.
«Komıssııa kelip túsken tamaq ónimderiniń sapasyn, taǵamdardy daıarlaý tehnologııasyn, ónimderdi saqtaý merzimine monıtorıng júrgizedi. Onyń barysynda as mázirin qurý boıynsha talaptardy buzý, ónimderdiń sertıfıkattarǵa sáıkes kelmeýi anyqtalyp otyrady. Monıtorıng barysynda tórt mektep dırektory men 13 balabaqsha qyzmetkeri tártiptik jazaǵa tartylǵan», - dedi basqarma basshysy.
Onyń sózine qaraǵanda, memlekettik mektepke deıingi uıymdarda tamaqtandyrý somasy 16800 teńgeni qurap otyr. Kúnine bir balaǵa 857 teńge bólinedi.
«Al jekemenshik balabaqshalarda 20 800 teńgeni qurap, kúnine 1040 teńge eskerilgen. Atap aıtqanda, tamaqtandyrý tarıfteri 7 jyl boıy qaralmaǵan, sońǵy tarıf 2015 jyly bekitilgen», - dedi Qasymhan Senǵazyev.
Ulttyq statıstıka bıýrosynyń 2022 jylǵy shildedegi derekteri negizinde Nur-Sultan qalasy boıynsha esepteýler júrgizilgen.
«2-den 3 jasqa deıingi bala úshin 17 997 teńgeni quraýy tıis, ıaǵnı kúnine 899 teńge bolady. 3-6 jas aralyǵyndaǵy jetkinshekke 24003 teńge qarastyrylýy kerek. Bul turǵyda kúninen bir balaǵa 1200 teńge bólinýi tıis. Qazirgi kezde kóp balabaqshada ónim jetkizýshileri aldynda biraz qaryzy bar. 16 800 teńgege balany tamaqtandyrý qıynǵa túsip otyr», - dedi basqarma basshysy.
«Memlekettik jáne jekemenshik mektepke deıingi uıymdarda tamaqtandyrý úshin ata-analardyń aqy tóleýi máselesin qarastyryp jatyrmyz. Ony qala ákimdigimen jáne qoǵamdyq keńespen talqylaýǵa usynys jasaıtyn bolamyz», - dedi Qasymhan Senǵazyev.