Elordadaǵy «Alanııa» aıyl jııar emes: túngi klýb talapty taǵy buzdy

NUR-SULTAN. QazAqparat - Ótken demalys kúnderi ǵana karantın talaptaryn buzǵany úshin ákimshilik jaýapkershilikke tartylǵan «Alanııa» túngi klýby taǵy da búlik shyǵardy, dep habarlaıdy QazAqparat tilshisi.

«Keshe túngi saǵat 03.31-de polıtsııaǵa «Alanııa» túngi klýbynyń jumys istep turǵany jáne kelýshilerdiń ýlap-shýlap jatqany týraly shaqyrtý ústi. Polıtsııa kezekshiligi birden jiberildi. Polıtsııa qyzmetkerleri kelgen kezde zalda shamamen 70 adam bolǵan. Kóńil kóterýshilerdiń bir bóligi bar ústelshesiniń janynda mýzyka tyńdap otyrsa, kelesi bóligi bılep júrgen», - delingen Nur-Sultan qalalyq Polıtsııa departamentiniń aqparatynda.

Departament málimetinshe, kóńil kóterýshilerdiń eshqaısysy qaýipsizdik sharalaryn saqtamaǵan. Osylaısha, karantın talabyn buzǵany úshin 32 adam Almaty aýdandyq polıtsııa basqarmasyna jetkizildi. Olardyń barlyǵy da túngi ýaqytta tynyshtyqty buzǵany úshin ákimshilik jaýapkershilikke tartyldy.

Sonymen qatar karantın rejımin buzǵandardy QR Ákimshilik quqyq buzýshylyq týraly kodeksiniń 425-babymen ákimshilik jaýapkershilikke tartý úshin materıaldar Taýarlar men kórsetiletin qyzmetterdiń sapasy men qaýipsizdigin baqylaý basqarmasyna jiberildi.

Aıta keteıik, bul, «Alanııa» túngi klýbynda oryn alǵan alǵashqy jaǵdaı emes. Buǵan deıin klýb basshylyǵy karantın rejımin buzǵany úshin birneshe ret ákimshilik jaýapkershilikke tartylǵan bolatyn.