Elordadaǵy 12 kóshege tarıhı tulǵalardyń esimin berý usynyldy
Otyrysta alǵash bolyp baıandama jasaǵan Astana qalasy Tilderdi damytý jáne arhıv isi basqarmasynyń basshysy Sáken Esirkep onomastıka komıssııasynyń qorytyndysyna saı, bas shahardaǵy 12 kóshege tanymal tarıhı tulǵalardyń esimin berýdi usyndy.
«Almaty» aýdany boıynsha A23 jobalyq kóshesine Ekinshi dúnıejúzilik soǵystyń jaýyngeri, maıdanger-jazýshy, bilikti jýrnalıst, prozashy – Ásken Nábıevtiń esimin berý usynyldy. Ásken aǵamyz osy jerdiń týmasy, keler jyly qalamgerdiń týǵanyna mereıli 100 jyl tolmaq. Aıta ketý kerek, bul usynys qala máslıhaty tarapynan da joldanǵan bolatyn. Al A24 jobalyq kóshesine aqyn, Qazaqstan Respýblıkasy Memlekettik syılyǵynyń laýreaty – Syrbaı Máýlenovtiń atyn berý qoldaý tapty.
«Esil» aýdany boıynsha E12 jobalyq kóshesine qazaqtyń qaharman qyzy, Keńes Odaǵynyń Batyry – Mánshúk Mámetovanyń esimin berýdi usynamyz. Aıta ketý kerek, qazirgi M. Mámetova kóshesi Baıqońyr aýdanynda ornalasqan, óte qysqa, uzyndyǵy 100 metrdeı ǵana. Bıyl Mánshúk apamyzdyń týǵanyna mereıli 100 jyl. Sondyqtan batyr apamyzdyń esimin laıyqty kóshege aýystyryp otyrmyz. E20 jobalyq kóshege áıgili akademık, energetık-ǵalym, QR UǴA akademıgi, Qazaqstandaǵy energetıka ǵylymynyń negizin qalaýshylardyń biri –Shapyq Shókınniń atyn berý oryndy dep esepteımiz. E753 jobalyq kóshege kórnekti memleket jáne qoǵam qaıratkeri, tarıhshy ǵalym, bilikti dáriger, professor, pedagog – Sanjar Asfendııarovtyń esimimen ataý usynylyp otyr.
«Saryarqa» aýdany boıynsha 187 jobalyq kóshege balalalar ádebıetiniń kórnekti ókili, klassık jazýshy, bárimiz biletin «Meniń atym Qoja» shyǵarmasynyń avtory – Berdibek Soqpaqbaevtyń atyn berý usynysy bar. Bıylǵy jyldy Memleket basshysy Balalar jyly dep jarııalaǵanyn jaqsy bilesizder. Sondyqtan atalǵan qalamgerdiń dál osy jyly ulyqtaýdyń da mazmundyq máni zor», - dedi basqarma basshysy baıandamasynda.
Megapolıs kósheleriniń birine Beıbarys Sultannyń esimin berý josparlanyp otyr.
«189 jobalyq kóshege qazaq dalasynan shyǵyp, Mysyr elinde 17 jyl mámlúkterdiń sultany bolǵan, tarıhtaǵy asa kórnekti qolbasshy – Beıbarys Sultannyń esimin berýdi qoldaýlaryńyzdy suraımyz. Aıta ketý kerek, keler jyly Beıbarys Sultannyń týǵanyna mereıli 800 jyl tolady.
Sonymen qatar «Almaty» aýdany boıynsha № 23-16 kóshesi men Maǵjan Jumabaev dańǵylyn biriktirip – Maǵjan Jumabaev dańǵyly dep ataýdy uıǵardyq. Óıtkeni 23-16 kóshe keıinnen salynǵan jáne Maǵjan Jumabaev kóshesiniń jalǵasy. Al Geıdar Álıev kóshesine – Qostanaı oblysyndaǵy eldi meken ataýy – Dıhankól degen atty berýdi usynamyz. Buqar jyraý kóshesinen bastalyp (Botanıkalyq saıabaq), № 29/1 kóshesinde aıaqtalatyn Saýran kóshesiniń qysqa bóligin Ázerbaıjan Respýblıkasynyń tuńǵysh prezıdenti jáne memleket qaıratkeri – Geıdar Álıevtiń atymen ataýdy usynamyz.
Munymen qosa, «Baıqońyr» aýdany boıynsha Mánshúk Mámetova kóshesine Іle ózeni boıynda XII-XIII ǵasyrda ómir súrgen ortaǵasyrlyq soltústik aımaqtaǵy iri qalanyń ataýy Qaramergen degen atty usynamyz», - dep málimdedi Sáken Esirkep.
Budan ózge, buryn Sábıt Muqanovtyń esimimen atalǵan kóshege Aqmola oblysyndaǵy Qostomar eldi mekeniniń ataýyn berý usynyldy. Degenmen bul bastama depýtattar tarapynan qoldaý tappady. Sondyqtan Qostomar ataýynyń ornyna Mádenıet jáne sport mınıstrlginiń onomastıkalyq jumysta qoldanýǵa usynǵan «Tarıhı tulǵalar» men «Jer-sý ataýlary» tiziminen basqa ataý qarastyrý tapsyryldy.