Elordadaǵy Nura aýdanynyń ákimi qyzmetinen ketti
«Búgin Nura aýdanynyń ákimi retindegi sońǵy jumys kúnim boldy. Mansabymdaǵy jańa kezeńge baılanysty jumys ornymdy aýystyrmaqpyn. Bul bir jarym jyl ómirimniń qyzyqty, keıde qıyn, biraq mańyzdy jáne nátıjeli bóligi boldy. Osy ýaqyt arasynda @nura.audany-daǵy áriptesterimmen ózimizdiń fýnktsıonaldaǵy máselelerdi sheship qana qoımaı, kópjyldyq suraqtarǵa sheshim taýyp, turǵyndardyń ómirin jaqsartýǵa barynsha tyrystyq dep aıta alamyn. Biz iri turǵyn úı keshenderin gazdandyrdyq, bul turǵyndarǵa kommýnaldyq qyzmet shyǵyndaryn eki esege azaıtýǵa múmkindik berdi. Birqatar kópqabatty úıdi ortalyq jylytýǵa qostyq, aýdannyń jer ýchaskelerin júıeli jáne tártippen qaıta qaraýdy bastadyq. Turǵyn úı keshenderiniń ornyna skverler, mektepter men balabaqshalar paıda bola bastady; alleıalar men aýlalarda jaryqtandyrý máselelerin sheshtik; baılanysty jaqsartý úshin bazalyq stantsııalar ornatyp, Jaǵalaý shaǵyn aýdanynda 18 gektar jerdi abattandyrýǵa kiristik. Sonymen qatar kún saıyn aýdandy kútip ustaý, kógaldandyrý jáne qala kelbetin jaqsartý boıynsha jumystar júrgizildi», - dep jazdy Júsip Jumaǵulov Instagram-daǵy paraqshasynda.
Sondaı-aq aýdan ákimi turǵyndar men memlekettik organdardyń birlesken kúsh-jigeriniń arqasynda nátıjege qol jetkenin aıtyp, turǵyndarǵa razylyǵyn bildirdi.
«Kezdesýlerge, jeke qabyldaýlarǵa kelgen, jazǵan, qońyraý shalǵan jáne mańyzdy suraqtar qoıǵan árbir adamǵa raqmet. Sizderdiń kómekterińiz ben nemquraıdy qaramaýyńyz bizge myńdaǵan azamattardyń jaǵdaıyn jaqsartýǵa kómektesti. Daýlassaq ta, oıymyzben kelispesek te, maqsatymyz ózimiz, otbasymyz turyp jatqan ortany jaqsartý boldy jáne osy ıdeıanyń mańynda kúshimizdi biriktire aldyq. @nura.audany áriptesterime alǵys aıtamyn. Memlekettik qyzmet úlken jaýapkershilikti talap etedi, al aýdan qurý, protsesterdi jolǵa qoıý jáne qysqa merzimde nátıjeni kórsetý – árqaısymyzdyń ózimizge alǵan mindetimiz boldy», - deıdi ol.