Elordadaǵy qurylysy 10 jyldan asqan JEO-3 qashan tolyqqandy jumys isteıdi

<p>ASTANA. KAZINFORM &ndash; Búgin Májilistiń jalpy otyrysynda Energetıka mınıstri Almasadam Sátqalıev qurylysy 10 jyldan asta ýaqytqa sozylǵan JEO-3 qurylysy qashan aıaqtalatynyn aıtty.</p>

«Jobalyq qujattamaǵa sáıkes stansa qurylysynyń jalpy quny – 146 mlrd teńge. Onyń 141 mlrd teńgesi – respýblıkalyq bıýdjetten. Búgingi tańda 116 mlrd teńge bólindi. Bul qarajatqa 4 qazandyq pen 1 bý trýbınasy salyndy. Bıylǵy jylytý maýsymynda stansa tolyq qýatynda jumys istedi. Biz qurylysty tolyq aıaqtaýdy 2026 jylǵa josparlap otyrmyz», - dedi ol depýtattardyń saýalyna oraı.

Aıta keteıik, ótken jyldyń jeltoqsanynda elorda ákimi Jeńis Qasymbek JEO-3-tiń birinshi kezeginiń jáne eki gaz jylý stansasynyń qurylysy aıaqtalǵanyn aıtqan edi.

«Injenerlik ınfraqurylym boıynsha jańa aýdandardy jetkilikti jylý qýatymen qamtamasyz etý úshin 3-shi jylý elektr stansasynyń birinshi kezeginiń, Turan jáne Ońtústik-shyǵys gaz jylý stansalarynyń qurylysy aıaqtaldy. Bul – qosymsha 1130 gkal jylý qýatyn qamtamasyz etti. Mysaly, bir apta buryn -32-33 gradýs aıaz bolǵanda qala shamamen 3 myń gkal jylý paıdalandy, bizde rezervte shamamen 600-700 gkal qaldy», - degen edi ol Ortalyq kommýnıkatsııalar qyzmetinde ótken baspasóz máslıhatynda.