Elordadaǵy Qyzylorda oblysynyń óner kúnderi «Jámılá» spektaklimen ashyldy

<p>Astanada Qyzylorda oblysynyń mádenıet jáne óner kúnderi ótýde. Óner merekesi Astana qalalyq Jastar teatry sahnasynda N.Bekejanov atyndaǵy qazaq akademııalyq mýzykalyq drama teatry qoıǵan &laquo;Jámılá&raquo; dramasymen ashyldy.</p>

Bul týraly Kazinform Qyzylorda oblysy ákiminiń baspasóz qyzmetine silteme jasap habarlaıdy.

Foto: Qyzylorda oblysynyń ákimdigi

Sh.Aıtmatovtyń bul dramasynda qalyptasqan dástúr men óz taǵdyr taqtasyndaǵy tańdaýǵa qarsy turǵan jas áıeldiń náýbetke toly mahabbaty beınelenedi. Jámılániń ómirindegi basty synaq ta osy bolatyn.

N.Bekejanov atyndaǵy qazaq mýzykalyq drama teatrynyń ártisteri sahnalaǵan qoıylymdy zııaly qaýym ókilderi bastaǵan mártebeli meımandar men elordalyq turǵyndar tamashalady.

Foto: Qyzylorda oblysynyń ákimdigi

Erteń memleket jáne qoǵam qaıratkeri T.Júrgenovtiń 125 jyldyǵy aıasynda R.Otarbaevtyń «Narkom Júrgenov» spektakli sahnalanbaq. Bul spektakl Keńes zamanynda Halyq aǵartý komıssary qyzmetinde júrip, ulttyń rýhyn oıatýǵa ólsheýsiz úles qosqan kórnekti memleket jáne qoǵam qaıratkeri Temirbek Qarauly Júrgenovtiń qıly taǵdyryn baıandaıdy.

Foto: Qyzylorda oblysynyń ákimdigi

Munan bólek, erteń elorda tórinde «Syr óńiri – Túrki órkenıetiniń altyn besigi» atty kórme ashylady. Kórme Syr óńiriniń tarıhyn baıandaıtyn 3 bólimnen turady. Ejelgi saq dáýirinen bastap búgingi kúnge deıin aımaqtyń áleýmettik-mádenı damýy men jetistikterin sýretteıtin kórmege Syǵanaq qalashyǵynan tabylǵan biregeı arheologııalyq jádigerler jáne elimizdiń tarıhyna ǵylymı jańalyq bolyp enetin «Shirik-Rabat saq jaýyngeri», «Syǵanaq hanshaıymy» rekonstrýktsııalary alǵash ret qoıylady.

Foto: Qyzylorda oblysynyń ákimdigi

Syr óńiriniń óner kúnderi «Beıbitshilik jáne kelisim saraıynda» ótetin Astana qalasynyń 25 jyldyǵyna arnalǵan «Sulý Syrdan Arý Astanaǵa» atty Qyzylorda oblysy óner sheberleriniń gala kontsertimen qorytyndylanbaq.