Elordada jyl basynan beri 470 qarý tárkilendi

NUR-SULTAN. QazAqparat – Elordanyń tártip saqshylary zańdy ruqsaty bar qarý ıelerine ony ustaý jáne tirkeý erejelerin qatań túrde saqtaý kerektigin eskertedi, dep habarlaıdy QazAqparat Elorda ınfoǵa silteme jasap.

«Jyl basynan tártip saqshylarymen azamattyq qarýdyń saqtalý jáne tirkeý erejesin buzǵany úshin 470 qarý tárkilenip, qarý ıeleri ákimshilik jazaǵa tartyldy. «Ýchaske» is-sharasyn ótkizý barysynda ýchaskelik polıtsııa ınspektory azamattyq qarý ıelerin tekserý barysynda, qarýdy saqtaý sharty buzylǵanyn anyqtady. Atap aıtqanda, qarý saqtalatyn temir seıfti bekitpeý, dabyldyń jumys istemeý sekildi birqatar kemshilik anyqtaldy», - dep habarlaıdy qalalyq Polıtsııa departamenti.

Departament málimetine súıensek, Nur-Sultanda qarýdy esepke alý, saqtaý, paıdalaný, tasymaldaý, Qazaqstannyń aýmaǵyna ákelý jáne el aýmaǵynda tranzıt tártibin buzǵan «B» esimdi azamatqa 10 AEK kóleminde aıyppul salyndy. Sonymen qatar, «Vınchester» markaly ańshy myltyǵy tárkilendi.

Sondaı-aq, Polıtsııa departamenti astanalyqtardan qarý-jaraqty ustaý, saqtaý jáne tirkeý erejelerin buzbaýǵa shaqyra otyryp, onyń erejelerin eske salady.

«Azamattyq qarýdy saqtaý jáne alyp júrý zańdy negizde ruqsat alǵan azamattarǵa ruqsat etiledi. Qarý-jaraq pen oq-dáriler qarý ıesiniń turǵylyqty jerinde qulyppen bekitilgen seıfte nemese temir shkafta saqtalýy tıis. Qarý ıesi olardyń qaýipsiz saqtalýyn qamtamasyz etýge jáne bóten adamdardyń alýyna jol bermeýge mindetti, ásirese balalar qarýy bar seıftiń kilti qaıda saqtalatynyn bilmeýi tıis. Qarýdy basqa adamdarǵa berýge úzildi-kesildi tyıym salynady. Ruqsat berý qujattaryn ýaqtyly resimdep, merzimin ýaqtyly uzartyńyz», - delingen habarlamada.