Elordada Jumyspen qamtý ortalyǵyna júgingenderdiń 40%-y elektrondy talonmen kelýde
«Nur-Sultan qalasy ákimdiginiń halyqty jumyspen qamtý ortalyǵy jumyssyz júrgen azamattarǵa jáne jumys berýshilerge eńbek deldaldyǵyn, áleýmettik qorǵaý jumystaryn uıymdastyrady. Bul ortalyq eki memlekettik baǵdarlama boıynsha qyzmet atqarady, olar: nátıjeli jumyspen qamtý jáne jappaı kásipkerlikti damytýdyń 2020-2021 jyldarǵa arnalǵan «Eńbek» baǵdarlamasy, sondaı-aq «Jumyspen qamtý jol kartasy» baǵdarlamasy. Qazirgi tańda daǵdarysqa qarsy jáne karantın kezinde jumyspen qamtý ortalyǵy onlaın jáne oflaın rejımde jumys istep jatyr», - deıdi «Nur-Sultan qalasy ákimdiginiń Halyqty jumyspen qamtý ortalyǵy» KMM jumysqa ornalasýǵa járdemdesý bóliminiń jetekshisi Azamat Baıtasov.
Onyń aıtýynsha, onlaın rejımde jumys berýshiler men jumyssyzdar qatarynda júrgen azamattar úıden, keńseden shyqpaı-aq Enbek.kz saıtyna kirý arqyly jumysqa shaqyrýǵa nemese jumysqa ornalasýyna bolady.
«Karantın kezinde úlken kezekte turmas úshin «Smart Astana» mobıldi qosymshasy arqyly jumyspen qamtý ortalyǵyna elektrondyq bron jasaýǵa bolady. Bul bron arqyly ózińiz jumyspen qamtý sharasyn, ýaqytyn, kúnin tańdaýyńyzǵa bolady. Qazirgi ýaqytta Jumyspen qamtý ortalyǵyna 200 adam júginse, sonyń 40%-y tek qana elektrondy talonmen kelýde», - deıdi ol.