Elordada jumys isteıtin jastarǵa jalǵa beriletin baspana bıyl da jalǵasady

NUR-SULTAN. QazAqparat - Elordada jastarǵa satyp alý quqyǵynsyz jalǵa páterler berý jobasy bıyl da jalǵasady, dep habarlaıdy QazAqparat qala ákimdigine silteme jasap.

Elorda jyl sanap ósip kele jatqanyn eskerer bolsaq, baspana máselesi qashan da ózekti. El basshylyǵy osy máseleni sheshý úshin 2019 jyldan beri jumys isteıtin jastarǵa satyp alý quqyǵynsyz jalǵa páterler berý jobasyn qolǵa aldy. Búginge deıin atalmysh baǵdarlama arqyly 1 400 otbasy baspanaly boldy.

Jastar jylynyń saltanatty ashylý sharasynda Qazaqstannyń Tuńǵysh Prezıdenti – Elbasy Nursultan Nazarbaev jumys isteıtin jastarǵa satyp alý quqyǵynsyz jalǵa páterler berý týraly tapsyrma bergen. Elbasynyń tapsyrmasyn 2019 jyly astana ákimdigi tolyqtaı oryndap, jumysshy jastarǵa 1 050 páterdiń («Astanalyq» jáne «Álem» saýda ortalyqtarynyń arasyndaǵy turǵyn úı kesheni) kiltin tabystady.

Kelesi 2020 jylǵa da dál osyndaı meje qoıylǵan edi, alaıda pandemııaǵa baılanysty josparǵa eriksiz ózgeris endi. Koronavırýs epıdemııasyna baılanysty byltyr 350 páter tapsyryldy. Jumysshy jastarǵa páterler Nur-Sultan qalasyndaǵy R.Qoshqarbaev dańǵyly, Qordaı jáne № 23-31 kósheleri qıylysyndaǵy, sol sııaqty Abylaı han dańǵyly men B.Momyshuly jáne R.Qoshqarbaev dańǵyldarynyń qıylysyndaǵy turǵyn úılerden berildi. Bul jylǵy jastarǵa berilgen baspana kólemi 32-48 sharshy metr aralyǵynda.

Elbasynyń bastaýymen júzege asqan jobanyń maqsaty – aldaǵy 5 jyl ishinde jastardyń qarajat jınap, jeke úıin satyp alýǵa jaǵdaı jasaý.

Jobaǵa qatysýshylarǵa qoıylar negizgi bes qaǵıdat bar: 29 jastan aspaǵan, jumys isteıtin, menshiginde turǵyn úıi joq, jınaq jasaý úshin depozıttik shotynyń bolýy, sondaı-aq sońǵy 6 aıda keminde 40 AEK tabysynyń bolýy. Jobaǵa qatysýshylar qatary da az emes. Byltyr 1-6 jeltoqsan aralyǵynda ótinimder qabyldaý uıymdastyrylyp, jalpy 5 463 ótinish qabyldandy.

Ótinim bergen qatysýshylar arasynda irikteý baldyq júıe boıynsha, al páterlerdi bólý ótinish berýshiniń otbasy quramyna sáıkes júrgizildi.

Bıyl jumys isteıtin jastarǵa satyp alý quqyǵynsyz jalǵa beriletin 1050 baspana berý jumysy jyl sońyna josparlanyp otyr.

Aıta keteıik, elordada baspana máselesin sheshý úshin aýqymdy sharalar júrgizilip jatyr. Ótken jyly elordada jalpy kólemi 3 mıllıon sharshy metr bolatyn turǵyn úı salynyp, el ıgiligine berdi. Sol sııaqty áleýmettik páter berý kórsetkishi de eselep ulǵaıdy. Máselen 2019 jyly 2 900 áleýmettik páter paıdalanýǵa berilse, bıyl bul kórsetkish 10 myńǵa deıin artty.