Elordada jol jóndeý jumystary Qala kúnine deıin aıaqtalady

ASTANA. QazAqparat - Astanada jol jabynyn jóndeý jáne qalpyna keltirý jumystary qarqyndy júrgizilýde. Qazirgi kezde 184 meken jaı boıynsha jol salý, qalpyna keltirý jáne ortasha jóndeý jumystary qolǵa alyndy. Úsh kóshede jol jóndeýdiń marshrýttyq ádisi engizilip, 9 kóshede oı-shuńqyrlar tegistelip jatyr. Bul týraly ákimdik saıtynda habarlady.

«Jol jóndeý jumystary bastalǵaly 157 nysandy qalpyna keltirý aıaqtaldy, sonyń ishinde 39-y - marshrýttyq ádispen júrgizilse, 118 - oı-shuńqyrlar jabyldy. Jalpy, joldardy qaıta jóndeý jumystaryn 1 maýsymǵa deıin aıaqtaý kózdelgen. Mekenjaılar boıynsha 20 nysandy jóndeý qajet, sonyń ishinde Orynbor kóshesi daıyn. Búgingi tańda 8 nysanda tıisti jumystar júrgizilip jatyr», - dedi Astana qalasynyń Avtomobıl joldary basqarmasy jol qurylysy jáne jóndeý bóliminiń basshysy Asqar Isakov.

Jol jabynyn ortasha jóndeý jumystary 1 shildege deıin aıaqtalmaq. Búginde Astananyń basty kósheleri jóndelip, kólik qozǵalysyna kedergi keltiretin qolaısyzdyqtardyń basym bóligi joıyldy.

Astana kóshelerinde 29 brıgada men 414 jumysshy eńbek etýde. Sondaı-aq, jol jabynynyń kemshilikterin joıýǵa jáne iri asfalt tóseý jumystaryna 160 artyq arnaıy tehnıka jumyldyrylǵan.

Aıta keteıik, jol jóndeý jumystary josparǵa sáıkes júrgizilýde - tez ári kólik qozǵalysyna eshqandaı qolaısyzdyqtar keltirilmeıdi. Mysaly, 8 myń sharshy metr jol jabynyna asfalt tóseý úshin bir aýysymdaǵy jumys ýaqyty jumsalady. Demalys kúni Kravtsov kóshesi tolyqtaı jóndelip bitti.

Eske salaıyq, bıyl 25,36 km jol salý, jóndeý jáne qalpyna keltirý josparlanǵan. Sonyń ishinde, 15,8 km jol salynady, 1,4 km qalpyna keltiriledi jáne 8,16 km ortasha jóndeý jumystary júrgiziledi.