Elordada Jeńis kúni ardagerlerge beriletin kómek kólemi belgili boldy
Qalalyq máslıhat depýtattary ol úshin jergilikti bıýdjetten qosymsha 33 mln 250 myń teńge bólý týraly usynysty qabyldady.
«Astana qalasy máslıhatynyń kezekten tys sessııasynyń qaraýyna Astana qalasyndaǵy UOS ardagerleri men múgedekterine Jeńis kúnin oraı qosymsha áleýmettik kómek kórsetý týraly máseleni usynady», - dedi Astana qalasynyń Jumyspen qamtý jáne áleýmettik qorǵaý basqarmasynyń basshysy Ermek Ospanov.
Onyń aıtýynsha, elordadaǵy UOS ardagerleri men múgedekterine qosymsha áleýmettik kómek kórsetý áleýmettik kómek kórsetýdiń mólsherin bekitý týraly qalalyq máslıhat sheshimimen 2017 jyly bekitilgen.
«9 mamyr - Jeńis kúnine oraı UOS ardagerleri men múgedekterine kórsetiletin áleýmettik kómek 67 AEK mólsherinde kórsetiledi. Bul - 161 135 teńge. Sizderdiń usynystaryńyzben biz barlyq esepti aılyq eseptik kórsetkishke keltirdik. Aǵymdaǵy jyly Jeńis kúnine oraı jergilikti bıýdetten qosymsha 33 mln 250 myń teńge bólý josparlanyp otyr, ol 95 UOS ardageri men múgedekterine 350 myń teńgeden áleýmettik kómek kórsetý kózdelip otyr. Osylaısha, usynylǵan jobany qoldaıtyn bolsańyzdar, Astana qalasyndaǵy UOS ardagerleri men múgedekteri bıyl 9 mamyr merekesine 511 135 teńge áleýmettik kómek alatyn bolady», - dedi ol.
Buǵan qosa basqarma basshysy qaladaǵy UOS ardagerleri men múgedekterine atalǵan áleýmettik kómek 1 mamyrǵa deıin aýdarylatynyn aıtty. Máslıhat depýtattary bul usynysty biraýyzdan qoldady.
Aıta keteıik, ótken jyly elordada 163 soǵys ardageri men múgedegi bolǵan. Búginde Astanada UOS 95 ardageri men múgedegi bar.