Elordada jekemenshik balabaqshalar taǵy 9 myń orynǵa memtapsyrys alady

ASTANA. QazAqparat - Astana ákimi Jeńis Qasymbek qalada jańadan salynatyn áleýmettik nysandar jaıly málimet berdi, dep habarlaıdy QazAqparat.

«Qalany aralaý barysynda, sol sııaqty turǵyndarmen kezdesýde de áleýmettik nysandar salý máselesi kóteriledi. Kólem boıynsha qazirgi deńgeıdi saqtap qana qoımaı áleýmettik nysandardyń (mektepter, medıtsınalyq pýnkter, áleýmettik turǵyn úıler jáne t.b.) sanyn da arttyramyz. Máselen aldaǵy oqý jylyna 13 mektep salýdy josparlap otyrmyz. Budan bólek, Memleket basshysynyń tapsyrmasy boıynsha «Jaıly mektep» ulttyq jobasy aıasynda 100 myń oqýshy ornyna (2 aýysymdy) arnalǵan 25 iri mektepti jobalaý jumysy bastaldy. Jańa formattaǵy bilim ordalarynyń qurylysyn 2023 jyly bastaımyz» dep jazdy ákim Instagram paraqshasynda.

Onyń aıtýynsha, keler jyly jekemenshik balabaqshalarǵa arnap 9 myń orynǵa arnalǵan qosymsha memlekettik tapsyrys berýdi, sol arqyly balalardy mektepke deıingi tárbıemen qamtýdy arttyrý josparlanǵan.

Búgin qarqyndy damyp kele jatqan aýdanda №98 «Mıras» memlekettik balabaqshasy ashyldy (Esil aýdany Kúltegin kóshesi).

Balabaqshanyń syıymdylyǵy - 300 oryn.

Munda oıyn jáne mýzyka bólmelerinen bólek pedıatr, logoped, psıholog kabınetteri, sondaı-aq emdeý kabıneti qarastyrylǵan medıtsınalyq kabınet bar.

Bul mekemede ınklıýzıvti bilim berýge de jaǵdaı jasalǵan.

Balabaqsha 2023 jyldyń qańtarynan bastap tolyq jumys isteıtin bolady.