Elordada «Jasyl el» jobasy boıynsha myńnan asa jastar jumysqa ornalasty

NUR-SULTAN. QazAqparat - Elordada «Jasyl el» jobasy boıynsha jarty jylda myńnan asa jastar jumysqa ornalasty. Jumys barysynda sanıtarlyq talaptar qatań saqtalady, dep habarlaıdy QazAqparat tilshisi .

Elorda ákimdiginiń málimetine qaraǵanda, «Jasyl el» jobasy aıasynda jastar 3 sanat boıynsha jumys isteıdi. Atap aıtqanda, 14-17 jas aralyǵyndaǵy kópbalaly jáne az qamtylǵan otbasyǵa jatatyn balalar, 17-22 jas aralyǵyndaǵy kolledj, JOO stýdentter jáne úshinshi eresek top – jumyssyz jastar sanatyndaǵy 18-29 jastaǵy azamattar.

Elordanyń Jasyl beldeýinde 120-dan astam jas jumys isteıdi. Olar qala mańyndaǵy tal men kóshetterdi – qaıyń, usaq japyraqty shegirshin, qaraǵaı, kóde, boz jıde, terekterdi qopsytýmen jáne sýarýmen aınalysady.

«Astana Ormany» JShS mekemesinde jastar 90 myń tenge jalaqyǵa qosa «Jasyl el» jobasynan arnaıy bólingen 35 394 tenge syıaqyǵa ıe bolyp, jumysyn jalǵastyrýda.

Sanıtarlyq qaýipsizdik talaptaryn saqtaý maqsatynda jastardyń bir jerge shoǵyrlanyp jumys isteýine jol berilmeıdi. Taza aýada, ashyq keńistikte 2 metrden kem emes qashyqtyq saqtaý qajet. Osy jobaǵa qatysýshy jastar mindetti túrde maskamen, qoldaryna qolǵap kıip jumys isteıdi.

Aıta ketsek, bıyl elordada stýdenttik qurylys jáne «Jasyl el» eńbek jasaǵyna 1200 jas qabyldandy. Ótken jyly kvota boıynsha 975 adam jumyspen qamtylǵan bolatyn.