Elordada jastar qozǵalysynyń halyqaralyq forýmy ótti
«Qazaqstan halqy Assambleıasy jastarynyń kezekti forýmyn ótkizýdemiz. Bul jıyn Nur-Sultan qalasy «Jańǵyrý joly» qozǵalysynyń uıymdastyrýymen ótýde. Sondyqtan qala ákimdigine, qalalyq «Jańǵyrý joly» belsendilerine osyndaı jumystaryńyz úshin rızashylyǵymdy bildirgim keledi. Men bul is-shara qyzyqty jáne tıimdi bolatynyna, jastardyń usynystary bolashaqta iske asyrylatynyna senimdimin», - dedi Qazaqstan halqy Assambleıasy Tóraǵasynyń orynbasary Janseıit Túımebaev.
Osy oraıda ol jastar qozǵalysy uıymdastyrǵan jumystarǵa jeke toqtaldy.
«2019 jyl - Jastar jyly. Osy baǵytta aýqymdy jumystar iske asyryldy. «Jańǵyrý joly» jastar qozǵalysy jol kartasyn júzege asyrý aıaqtalyp keledi. Jyl boıynda atalǵan qozǵalys 5 myńnan astam adamdy qamtı otyryp, 29 jobanyń uıymdastyrýshysy boldy. Óńirlik deńgeıde 200 myńǵa tarta jastardy qamtyp, 2 400 shamasynda sharalar ótkizildi», - dedi J. Túımebaev.
Budan bólek ol 2020 jyly Qazaqstanda Volonter jyly bolatynyn aıta kele, elimizde eriktilerdiń aýqymdy áleýetin damytýǵa ekpin qoıylatynyn jetkizdi.
«Biz ózimizdiń jastarymyzben maqtan tutamyz. Bıyl Arys qalasyndaǵy týyndaǵan qıyn jaǵdaı kezinde jastarymyz Assambleıanyń gýmanıtarlyq aktsııasynda belsendi boldy. Sondaı-aq «Arys, biz birgemiz!» jalpyulttyq aktsııasynda da bar kúsh-jigerlerin saldy», - dedi Janseıit Túımebaev.
Óz kezeginde Nur-Sultan qalasy ákiminiń orynbasary Baqtııar Máken búginde elordada jastardyń sany 245 myńnan asqanyn, stýdentter 82 myńnan astam ekenin aıtty.
«Jastar jylynda memleket tarapynan jastarǵa erekshe nazar aýdarylyp otyr. Osy oraıda bilim berý, eńbekke tartý baǵytynda jobalar iske asyrylýda. Jumys isteıtin jastarǵa 5 jylǵa satyp alý quqyǵynsyz 1050 páter beriledi. Baǵdarlama aldaǵy úsh jylda jalǵasatyn bolady. Memleket basshysy Qasym-Jomart Toqaev 2020 jyldy eriktiler jyly dep jarııalady. Bul qozǵalys elimiz jáne qorshaǵan ortaǵa úlken paıda ákeledi»,-dedi ákimniń orynbasary.
Jalpy, forýmnyń ótkizilýi Tuńǵysh Prezıdent kúni qarsańymen jáne Jastar jylynyń aıaqtalýymen tuspa-tus keldi. Onyń jumysyna QR Parlamentiniń depýtattary, memlekettik organdardyń ókilderi, qalalyq qurylymdardyń, qoǵamdyq uıymdardyń basshylary, kórshiles elderdegi jastar kóshbasshylary, elorda etnomádenı birlestikteri jastar qanatynyń músheleri qatysty. Jastar dıalogynyń negizgi taqyryptary - memlekettik jastar saıasatyna, negizgi oqıǵalar men Qazaqstandaǵy Jastar jylynyń qorytyndysyna arnaldy.