Elordada Jastar isi jónindegi keńes otyrysy ótti

NUR-SULTAN. QazAqparat - Búgin astanada Jastar isi jónindegi keńes otyrysy ótip, jastardy jumyspen, baspanamen jáne koronavırýsqa qarsy vaktsınatsııamen qamtý, volonterlik qozǵalysty damytý máseleleri qaraldy, dep habarlaıdy QazAqparat.

Elorda koronavırýs boıynsha «qyzyl» aımaqta ornalasýyna baılanysty otyrys onlaın formatta ótti jáne oǵan qala ákiminiń orynbasary Baqtııar Máken tóraǵalyq etti.

«Elimizdiń damýynda jastardyń alatyn orny óte erekshe. Memleket basshysy óz sózinde «Táýelsizdik rýhymen ósip kele jatqan búgingi jas býyn – bizdiń erteńgi úmitimiz, senimdi tiregimiz», - dep atap ótti. Bul rette, Jastar jáne Volonterlar jyldary memleket tarapynan óskeleń urpaqty qoldaýǵa baǵyttalǵan mańyzdy qadam boldy. Bizdiń basty maqsatymyz – elordany jan-jaqty damyǵan álemdik qalaǵa aınaldarý, turǵyndardyń, jastardyń ál-aýqatyn kóterýge baǵyttalǵan ekonomıkany damytý jáne tıimdi josparlaýdy júzege asyrý bolyp sanalady. Bul maqsattar men mindetter elordalyq jastardyń árqaısysyna ortaq, sondyqtan sizderdi elordanyń ósip-órkendeýine erekshe úles qosady dep senemin», — deıdi Baqtııar Máken.

Qazaqstannyń tabysty bolashaǵy úshin jaýap beretin elimizdiń erteńi – bul jastar. Qala ákiminiń orynbasary Jastar keńesi tájirıbe almasý jáne ıdeıalardy júzege asyrýdyń ózara suhbat alańy bolýy tıis ekenin aıryqsha atap ótti.

Jıyn barysynda elordadaǵy memlekettik jastar saıasaty salasynda atqarylyp jatqan jumystar týraly Jastar saıasaty máseleleri basqarmasynyń basshysy Qaırat Qambarov baıandama jasady. Ol jastarǵa jasalyp jatqan jaǵdaıdan habardar etip, volonterler jumysynyń tabysty júzege asyrylyp jatqanyn málim etti.

Jastar jylynyń saltanatty ashylý sharasynda QR Tuńǵysh Prezıdenti – Elbasy Nursultan Nazarbaev jumysshy jastarǵa satyp alý quqyǵynsyz jalǵa páter berý týraly tapsyrma bergen bolatyn. Osyǵan oraı jumysshy jastarǵa usynylatyn baspana baǵdarlamasy boıynsha atqarylyp jatqan jumystar jaıly Qurylys jáne turǵyn úı saıasaty basqarmasynyń basshysy Ánýar Saıpov habardar etti.

Sondaı-aq jıyn barysynda Jumyspen qamtý jáne áleýmettik qorǵaý basqarmasy basshysynyń orynbasary Baqtııar Ǵarıfýllın, Qoǵamdyq densaýlyq saqtaý basqarma basshysynyń orynbasary Álııa Shaızadaqyzy, Nur-Sultan qalasy volonterlar shtabynyń tóraǵasy Shyńǵys Tileýlın óz salalarynda atqarylyp jatqan jumystar jaıly baıandama jasady.

«Baǵdarlamaǵa sáıkes barlyq máseleler qaralyp, usynystar qabyldandy. Búgingi keńes qorytyndysy boıynsha hattama toltyrýdy Nur-Sultan qalasynyń Jastar saıasaty máseleleri basqarmasynyń basshysy Qaırat Qambarovqa tapsyramyn», — dedi elorda ákiminiń orynbasary Baqtııar Máken.