Elordada jastar arasynda «Til sheberi - 2013» qalalyq baıqaýy ótedi

ASTANA. 17 sáýir. QazAqparat - 2011-2020 jyldarǵa arnalǵan Qazaqstan Respýblıkasyndaǵy Tilderdi damytý men qoldanýdyń Memlekettik baǵdarlamasyn júzege asyrý maqsatynda elordada tuńǵysh ret jastar arasynda «Til sheberi» qalalyq baıqaýy ótkiziledi. Bul týraly astana.kz saıtyna Astana qalasynyń Tilderdi damytý basqarmasynan málim etti.

Baıqaý qazaq, orys jáne aǵylshyn tilderin erkin meńgergen daryndy jastardy qoldaý, memlekettik tildiń qoldanys aıasyn keńeıtip, mártebesin kóterý, sondaı-aq, iskerlik jáne halyqaralyq qarym-qatynas tilderin jastardyń meńgerý dárejesin anyqtaý baǵytynda uıymdastyrylady.

Ereje boıynsha 18 ben 25 jas aralyǵyndaǵy kez kelgen ult ókili men kásip ıesi baıqaýǵa qatysa alady.

Baıqaý 4 týrdan turady. Olar: «Ulttanym» - onda qatysýshy tarıh jáne qazaq halqynyń qaıratker tulǵalary týraly suraqtarǵa jaýap beredi; «Mádenıettanym» - balalar ádet-ǵuryp, salt-dástúr turǵysyndaǵy saýaldarǵa orys tilinde jaýap beredi; «Eltanym» - munda qazaqtyń jeri men onyń ulan-baıtaq aýmaǵy jóninde aǵylshyn tilinde jaýap berý qajet. Al, «Ónertanym» bul - shyǵarmashylyq baıqaý - án shyrqalyp, mánerlep óleń, monolog, qazaqstandyq otansúıgishtikti, birlik pen halyqtar dostyǵyn nasıhattaıtyn ósıet sózder oqylady.

Sonymen qatar alǵashqy eki týrda qatysýshylar tóreshiler aldyna qazaq halqynyń ulttyq kıimin kıip shyǵýy kerek bolsa, úshinshi týrda klassıkalyq úlgide, al tórtinshi týrda óziniń shyǵarmashylyq nómirine saı kıimdi erkin tańdaýyna bolady.

Jeńimpazdar dıplom jáne baǵaly syılyqtarmen marapattalady. Birinshi oryn alǵan jeńimpaz maýsym aıynyń aıaǵynda ótetin «Til sheberi-2013» respýblıkalyq baıqaýynda Astananyń namysyn qorǵaıtyn bolady.