Elordada jastar arasynda koronavırýs juqtyrý oqıǵalary tekserilýde

NUR-SULTAN. QazAqparat – Qazaqstannyń bas memlekettik sanıtar dárigeri Aıjan Esmaǵambetova elordada jastar arasynda koronavırýs juqtyrýdyń birqatar oqıǵasyna qatysty tekserý júrip jatqanyn aıtty, dep habarlaıdy QazAqparat tilshisi.

Baspasóz máslıhatynda sońǵy kúnderi elordada men Almatyda jastar arasynda koronavırýs ınfektsııasyn juqtyrý oqıǵalaryna qatysty saýal qoıyldy.

«Almaty boıynsha toqtalsaq, olar patrýldik is-sharalarmen aınalysqandar. Shynymen de olardyń arasynda indetke shaldyǵý anyqtaldy. Barsha kontıngent tıisti testileýden ótedi. Naqty málimet alý úshin barlyǵyn tekserýden ótkizemiz», - dedi Aıjan Esmaǵambetova onlaın rejımde ótken baspasóz máslıhatynda.

Sonymen qatar ol elordada jaǵdaıǵa baılanysty tıisti tekserý júrip jatqanyn atap ótti.

«Nur-Sultan qalasyndaǵy jaǵdaıǵa qatysty epıdemıologııalyq tekserý júrgizilip jatyr. Onyń nátıjesi boıynsha atalǵan adamdardyń indetke shaldyǵýynyń naqty sebebi belgili bolady. Osydan keıin tolyq aqparat beriledi», - dedi Qazaqstannyń bas memlekettik sanıtar dárigeri.

Budan buryn habarlanǵandaı, Aıjan Esmaǵambetova mamyrdyń sońynda elimizde koronavırýs juqtyrǵandar sany 5,3 myńǵa jetýi múmkin ekenin aıtty.