Elordada Jánııa Áýbákirovanyń avtorlyq kitabynyń tusaýy kesildi
«Bul eńbegimdi kóp jyldan beri jeke kúndeligimde jınaqtalǵan estelikter toptamasy desem de bolady. Munda ár elde, ár qalada bolǵan kezde, áýejaıda ushaq kútip otyrǵanda jazǵan jazba estelikterim bar. Men jazýshy emespin, sondyqtan maǵan óz jazbalarymdy jınaqtap, kitap qylyp shyǵaraıyq degen usynys kelip túskende qobaljyǵanym ras. Shyǵarmanyń negizgi bóligi árıne shyǵarmashylyǵymmen baılanysty, óıtkeni meniń bar ómirim mýzykamen baılanysty ekeni barshaǵa aıan. Kitap jalpy alǵanda mýzykaǵa arnalǵandyqtan bul kásibı mýzyka mamandary men mýzyka oqytýshylaryna arnalady. Negizi týyndyny ázil janrynda jazǵym kelgen. Sebebi munda shyǵarmashylyq ómirimde máńgi este qalatyn kezeńdermen bóliskem, árıne onyń ishinde qyzyqty sátter de bar», - dedi J. Áýbákirova.
Avtordyń aıtýynsha, týyndyda 30 jyl boıǵy túrli estelikter jınaqtalǵan jáne ony jınaqtap kitap etip jasaýǵa 2-3 aı ýaqyt jumsaldy. Sol sııaqty 1500 danamen jaryq kórgen «Varıatsıı na temy...» atty shyǵarmany aldaǵy ýaqytta oqyrmandar qazaq jáne frantsýz tilderinde oqı alatyn bolady.
«Árıne, qandaı avtor óz eńbegine balalyq shaǵy men otbasy jaıly jazbaı ketedi, ol bólimde meniń jaqyn adamdarymnyń ónerge kelgen kúnnen bastap meni qoldaýy men ishki sezimderimmen de bólistim. Odan bólek, mýzykalyq avtorlyq mektebimniń jumysy týraly da jazdym. Konservatorııadaǵy basshylyq qyzmet atqarǵan kezderim, qysqasha aıtqanda óner salasyndaǵy ǵumyrnamalyq shyǵarma. Jáne dál osyndaı tanystyrylym jýyrda Almatyda da uıymdastyrmaqpyz»,- deıdi ol.
Sondaı-aq, tanystyrylym barysynda elimizge belgili ártis týraly qysqa metrajdy derekti fılm kórsetildi.
Týyndynyń tusaýkeser keshine halyq ártisiniń jaqyndarynan bólek, belgili qoǵam qaıratkerleri, ónerdegi áriptesteri men shákirtteri qatysty.