Elordada «Jańa syn-qaterler kezeńindegi medıa» atty dóńgelek ústel ótti

NUR-SULTAN. QazAqparat - Elordada Qazaqstandaǵy Ulybrıtanııa elshiligi jáne Nur-Sultan qalasyndaǵy EQYU Baǵdarlamalyq keńsesiniń qatysýymen «Jańa syn-qaterler kezeńindegi medıa» taqyrybynda dóńgelek ústel ótti, dep habarlaıdy QazAqparat.

«Bul kezdesýdegi basty maqsat - Qazaqstandaǵy sóz erkindiginiń damýyna yqpal etý. Men tilshilerdiń erkindigi men quqyqtaryn qamtamasyz etýge qatysty kez kelgen máseleni belsendi túrde qoldaımyn. 2019 jylǵy kórsetkishke sáıkes, Qazaqstan sóz erkindigi boıynsha álem elderi arasynda 158-orynda tur. ARTICLE 19 jobasy buqaralyq aqparat quraldarynda sóz erkindigin keńeıtýge baǵyttalǵan», - deıdi Ulybrıtanııa elshisiniń orynbasary Djonatan Leıfıld.

Shara barysynda aqparat salasyndaǵy zańnamany jetildirý joldary talqylandy.

«Bizdiń aldymyzda BAQ týraly zańnamaǵa reforma jasaý mindeti tur. Eń aldymen aqparatty qabyldaý týraly steroetıpterdi ózgertýimiz kerek. Biz BAQ týraly jáne sóz erkindigine kepildik berý týraly zańdar kontseptsııasyn usynamyz. Ony reforma jasaýdyń bir nusqasy retinde usynamyz», - deıdi «Ádil sóz» sóz erkindigin qorǵaıtyn halyqaralyq qordyń prezıdenti Tamara Kaleeva.