Elordada jalǵan nómirmen júrgen júrgizýshi ustaldy
17:25, 04 Qarasha 2020
NUR-SULTAN. QazAqparat – Elordadaǵy Máńgilik el kóshesinde jalǵan memlekettik nómir taǵyp alǵan «Toyota Estima» kóligi ustaldy. Bul týraly QazAqparat tilshisi qalalyq polıtsııa departamentiniń baspasóz qyzmetine silteme jasap habarlaıdy.
Anyqtalǵandaı, elordada ustalǵan avtokóliktiń nómirimen birdeı kólik Atyraý qalasynda QR QK 345-baby 3-bóligi boıynsha qylmystyq isten ótip jatyr. Naqtyraq aıtqanda, Atyraýdaǵy júrgizýshiniń jol erejesin buzýy saldarynan abaısyzda kisi ólimi bolǵan. 2019 jyldyń jeltoqsan aıynan beri astanada ustalǵan kóliktiń «egizi» aıyppul turaǵynan shyqpaǵan.
Birshama ýaqyttan keıin Atyraý qalasynda turatyn azamatqa Almaty men Nur-Sultan qalalarynda ákimshilik quqyqbuzýshylyq jasaǵany týraly hat kele bastapty. Osydan keıin kólik ıesi polıtsııaǵa aryz túsirgen. Elordada ustalǵan júrgizýshiniń kóligi kommýnaldyq aıyppul turaǵyna jetkizildi. Qazir istiń tolyq mán-jaıy anyqtalýda.