Elordada WorldSkills respýblıkalyq chempıonaty ótip jatyr

ASTANA. QazAqparat – Astanada kolledj stýdentteri arasynda «WorldSkills» respýblıkalyq chempıonaty ótýde. Oǵan 17 oblys pen 3 respýblıkalyq mańyzy bar qaladan 500-ge jýyq stýdent qatysyp jatyr, dep habarlaıdy QazAqparat tilshisi.

Chempıonatta qatysýshylar 30 mamandyq boıynsha baq synaýda. Olarǵa óz salalary boıynsha arnaıy tapsyrmalar beriledi. Soǵan sáıkes, belgilengen ýaqyt ishinde stýdentter qoıylǵan mindetti oryndaýy tıis. Atap aıtqanda, qatysýshylarǵa kirpish qalaý, kólikterdiń tehnıkalyq aqaýlaryn jóndeý, dánekerleý isi men ІT salasy boıynsha tapsyrma beriledi.

«Bul birinshi kolledjderdiń deńgeıinde ótti. Keıin oblystyq deńgeıde boldy. Odan jeńgenderi qazir Astana qalasynda 30 mamandyq boıynsha saıysqa túsip jatyr. Negizi Qazaqstan dúnıejúzilik «WorldSkills» qozǵalysynyń múshesi. Eń birinshi qatysqanda biz 50-den keıingi orynda bolǵanbyz. Odan keıin 15-orynǵa túsip, qazirgi tańda úzdiń ondyqqa kirip otyrymyz. «WorldSkills» ol tek qana jarys emes, ol bizdiń kásiptik-tehnıkalyq bilim berý júıesin jańǵyrtýdyń durys joly. Óıtkeni, biz dúnıejúzilik tanymal mamandyqtardy otandyq bilim berý júıesine engizip jatyrmyz. Sondyqtan bul óte mańyzdy. Ózderińiz biletindeı, Memleket basshysy únemi qundylyqtar týraly aıtyp otyrady. Sonyń ishinde jastardy otansúıgishtik, bilimge qushtarlyq jáne eńbeksúgishtik qundylyqtaryna baýlý tapsyrmasy bar. Osy oraıda, biz úshin eńbek adamyn qurmetteý, jumysshy mamandyqtaryn damytý óte mańyzdy», - dedi Oqý-aǵartý mınıstri Ashat Aımaǵambetov.

Respýblıkalyq chempıonattyń jeńimpazdar ulttyq quramanyń múshesi atanady jáne olar álemdik deńgeıdegi saıysqa qatysýǵa múmkindik alady.