Elordada VI Astana ekonomıkalyq forýmy aıasynda ınnovatsııalyq jobalar kórmesi ashyldy

ASTANA. 23 mamyr. QazAqparat - Búgin elordadaǵy Táýelsizdik saraıynda VI Astana ekonomıkalyq forýmy aıasynda QR Indýstrııa jáne jańa tehnologııalar mınıstrliginiń qoldaýymen ınnovatsııalyq jobalar kórmesi ashyldy. Sharany QR «Tehnologııalyq damý jónindegi ulttyq agenttigi» AQ uıymdastyrýda.

«Kórmede 15 eýropalyq tehnologııa jáne 20 qazaqstandyq ınnovatordyń tehnologııalary bar. Biz osy kórme arqyly Qazaqstan kásipkerlerine Eýropanyń tehnologııalaryn tanystyrýdy maqsat tuttyq. Sonymen qatar Eýropadan kelgen áriptesterimizge Qazaqstanda da óte jaqsy tehnologııalar bar ekendigin kórsetýdi mejelep otyrmyz», - dedi atalǵan agenttik basqarmasy tóraǵasynyń orynbasary Ánýarbek Sultanǵazın.

Eki bólimnen turatyn kórmeniń birinshisinde Qazaqstannyń ınnovatsııalyq damý ınstıtýttarynyń jumystary kórsetilse, ekinshisi eýropalyq tehnologııalarǵa arnalǵan.

Aıta keterligi, mundaı kórme TMD aýmaǵynda alǵash ret Elbasy Nursultan Nazarbaevtyń bastamasymen ótýde.