Elordada úzdik arhıvıst belgili boldy

ASTANA. QazAqparat - Astanadaǵy Memlekettik arhıvte «Eń úzdik arhıvıst» baıqaýy ótti, dep habarlaıdy QazAqparat qala ákimdiginiń saıtyna silteme jasap. 

Saıys 23 sáýir men 25 sáýir aralyǵynda jarııalanǵan bolatyn. Konkýrsqa  Memlekettik arhıvtiń 16 mekemesi qatysty.

Baıqaýdyń qorytyndysy jarııalanyp, jeńimpazdar anyqtaldy. Astana qalasy JQTB-nyń aldyn alý jáne baqylaý ortalyǵynyń arhıvısi Sharıpa Tólebaeva bas júlde, Qıyn jaǵdaıdaǵy adamdar úshin ońaltý ortalyǵynyń arhıvısi Ádilhan Beksultanov 1-oryn, «Astana bas jospar ǵylymı zertteý jobasy ınstıtýty» JShS arhıvısi Svetlana Repına 2-oryn, Astana qalasy Dermatologııa jáne jynys qatynasy aýrýlaryn aldyn ala emdeý ortalyǵy arhıvısi Baný Ahmetova 3-oryndy jeńip aldy. Al qalǵan 12 murǵaat qyzmetkerine alǵys hattar tabys etildi. 

«Qoǵam damýynyń túrli satylarynda bılik organdarynyń memlekettik saıasaty men strategııalyq maqsat múddelerine tıisinshe basymdyq beriledi. Mine, sondyqtan da bolar, arhıvısterge ótken urpaq qaldyrǵan baılyqtardy kózdiń qarashyǵyndaı saqtaý, memleketimizdiń ósý jolyndaǵy kemel isterdi bar bolmysymen kórsetý, onyń órkenıetti dúnıejúzilik qaýymdastyq talaptaryna saı bolýyn eskerý mindetteri júktelgen», - dedi qalalyq Tilderdi damytý jáne arhıv isi basqarmasynyń basshysy Qaırat Qambarov.

Baıqaý qalalyq Tilderdi damytý jáne arhıv isi basqarmasynyń qoldaýymen Astana qalasynyń Memlekettik arhıvinde elordanyń 20 jyldyǵyna arnaldy.