Elordada úıge gaz kirgizý quny 30% arzandady

NUR-SULTAN. QazAqparat - Nur-Sultanda úı ishine tikeleı gaz ornatý quny 30%-dan astam tómendedi. Elorda ákimdigi montajdaý jumystarynyń qurylysyna mamandanǵan jeke uıymdarmen birneshe ret kezdesý ótkizdi.

Bul týraly búgin óziniń Instagram paraqshasyna elorda ákimi Altaı Kólginov jazdy, dep habarlaıdy QazAqparat.

Shahar basshysynyń aıtýynsha, mysaly «Álııa servıs» JShS úı ishinde gaz ótkizý qunyn 240 myń teńgeden 150 myń teńgege deıin tómendetti (37,5% - ǵa), «QazTransGaz Aımaq» AQ - 123 myń teńgege jýyq jáne basqa da birqatar jeke uıym úı ishine gaz ótkizý qunyn arzandatty. Bul somaǵa gaz jabdyǵy men jıyntyqtaýyshtardyń quny kirmeıdi.

Esterińizge sala keteıik, Turǵyn úı alaptarynda gaz taratý jelilerin, onyń ishinde turǵyn úıler boıyndaǵy oramishilik jelilerdi salýmen Nur-Sultan ákimdigi aınalysady, al úı ishine tikeleı jetkizýine jeke uıymdar jaýapty.
«Turǵyndar kez-kelgen mamandandyrylǵan kompanııany tańdaýǵa quqyly. Jobanyń áleýmettik mańyzdylyǵyn eskere otyryp, ákimdik jeke uıymdarmen montajdaý jumystarynyń qunyn tómendetý boıynsha kelissózder júrgizýde. Eseptegishterdiń ózderi azamattarǵa tegin beriledi»,-deıdi ákim.

Onyń sózine qaraǵanda, qalany gazdandyrý úsh kezeń boıynsha júrgiziledi. Bıylǵy jylytý maýsymynda Jeleznodorojnyı, Kóktal-2, Agroqalashyqtyń bir bóligi gazǵa kóshiriledi. Sonymen qatar, Kóktal-1, Promyshlennyı, Ońtústik-Shyǵys turǵyn alaptarynda qurylys-montajdaý jumystary júrgizilýde.

Atalǵan turǵyn alaptarda gazben jabdyqtaýdyń ishki jelilerin júrgizgen turǵyndar gazǵa qosylý úshin «QazTransGaz Aımaq» AQ-ǵa júgine alady (Respýblıka dańǵyly, 24, «Parasat» BO). Bul uıym gazben jabdyqtaýdyń ishki jelileriniń qaýipsizdigimen jáne tikeleı qosylýyn tekserýmen aınalysady, sondaı-aq odan ári paıdalanýǵa jaýap beredi.

«Elordany gazdandyrý - Elbasynyń tarıhı jobasy. Ol ekologııany jaqsartyp qana qoımaı, jeke sektor turǵyndarynyń ómir súrý jaǵdaıyn aıtarlyqtaı jeńildetedi. Gazdandyrý protsesi Memleket basshysynyń baqylaýynda»,-deıdi Altaı Kólginov.