Elordada úı karantınin buzatyndar sany artyp tur

NUR-SULTAN. QazAqparat – Elordada úı karantınin buzatyndar sany artyp tur. Bul týraly Nur-Sultan qalasynyń bas sanıtar dárigeri Sarhat Beısenova aıtty, dep habarlaıdy QazAqparat tilshisi.

«Elordada úı karantınin buzýshylar sanynyń artqanyn atap ótkim keledi. Osy jyldyń basynan 10 aqpanǵa deıin «Ashyq» jobasyna qatysatyn nysandarda úı karantınin buzǵan 6 476 kelýshi anyqtaldy. Onyń ishinde 6 398 kelýshiniń «qyzyl», al 78 adamnyń «sary» mártebesi bolǵan», - dedi Sarhat Beısenova elorda ákimdiginde uıymdastyrylǵan brıfıng barysynda.

Onyń atap ótýinshe, bul statıstıka ókinishke qaraı kóptegen adamnyń ózine, densaýlyǵyna, tóńiregindegi jandarǵa jaýapkershiliksiz qaraıtyndyǵyn kórsetedi.

«Karantın men oqshaýlaný rejımin saqtaý – ár adamnyń jaýapkershiligi. Ásirese, bıznes sýbektileriniń biz usynǵan karantın sharalaryna barynsha jaýapkershilikpen qarap, ony saqtaýy óte mańyzdy», - dedi elordanyń bas sanıtar dárigeri.