Elordada úsh kún ishinde 45 mekemede karantın talaptary buzyldy

NUR-SULTAN. QazAqparat - Elordanyń monıtorıngtik toptary táýlik boıy kúsheıtilgen rejımde qalanyń kásipkerlik nysandarynda karantın talaptarynyń saqtalýyn tekserýde. Kún saıyn ondaǵan mekemede shekteý sharalary buzylǵany anyqtalady. Ádette, olardyń sany demalys kúnderi tipten artyp ketedi, dep habarlaıdy Nur-Sultan ákimdiginiń resmı saıty.

Ótken táýlikte, 8 tamyzda Nur-Sultanda 11 kásipkerlik nysany karantındi buzdy.

Almaty aýdanynda monıtorıngtik toptar «Kısh Mısh» kafesinde, «ChBD» túngi klýbynda, «Panaehalı» jáne «Sova» barlarynda karantın rejıminiń saqtalmaǵanyn anyqtady.

Qoǵamdyq tamaqtaný oryndary úshin belgilengen jumys kestesi Esil aýdanynda ornalasqan «Lavash Food» jáne «Bobber Bri» jyldam tamaqtaný nysandarynda, sondaı-aq «Pavilion» meıramhanasynda saqtalǵan joq. Sonymen qatar, qyzmetkerler men kelýshiler maska rejımin saqtamaǵany anyqtaldy.

Saryarqa aýdanynda karantın buzýshylar tizimine «El plaza» meıramhanasy, «Karıma» kafesi, «Kega mucic bar» bary endi.

Sondaı-aq, Baıqońyr aýdanynda ornalasqan «Xalva» meıramhanasynda shekteý sharalary saqtalǵan joq.

Osylaısha, 6-8 tamyz aralyǵynda Nur-Sultanda úsh kún ishinde 45 mekeme karantındik shekteýlerdi buzdy. Esterińizge sala keteıik, demalys kúnderi qoǵamdyq tamaqtaný nysandaryna kelýshilerdi qabyldaýǵa tyıym salynady. Osyǵan qaramastan, keıbir kafeler men meıramhanalar esikterin jaýyp alyp toı ótkizgen.

Tártip buzýshylarǵa qatysty jınalǵan materıaldar tıisti sharalar qabyldaý úshin sanıtarlyq-epıdemıologııalyq baqylaý salasyndaǵy ýákiletti organǵa berildi.

Esterińizge sala keteıik, Nur-Sultandaǵy epıdemıologııalyq jaǵdaı turaqsyz, táýlik saıyn qalada KVI juqtyrýdyń 1200 jaǵdaıy anyqtalady, aýrýhanalarǵa koronavırýstyń ortasha jáne aýyr aǵymy bar 300-ge deıin adam túsedi. Osyǵan baılanysty elorda turǵyndary men qonaqtary, sondaı-aq kásipkerlik nysandary sanıtarlyq normalardy jáne karantın rejıminiń talaptaryn múltiksiz saqtaýy, adam kóp jınalatyn oryndardan aýlaq bolýy tıis.