Elordada Úndistan men Ortalyq Azııa elderiniń Qaýipsizdik keńesi hatshylarynyń 2-kezdesýi ótip jatyr
Іs-shara barysynda elimizdiń Qaýipsizdik keńesi hatshysy Ǵızat Nurdáýletov Memleket basshysy Qasym-Jomart Toqaevtyń kezdesýge qatysýshylarǵa quttyqtaýyn oqyp berdi.
«Ortalyq Azııa-Úndistan» Memleket basshylarynyń birinshi sammıtinde óńirlik qaýipsizdikti nyǵaıtý bizdiń ózara is-qımylymyzdyń basty basymdyqtarynyń biri retinde belgilengen edi. Elderimizdiń Qaýipsizdik keńesi hatshylarynyń, ulttyq qaýipsizdik jónindegi keńesshileriniń ekinshi kezdesýi osynaý ózekti mindetti júzege asyrýǵa mańyzdy úles qosady. Qazaqstan ShYU sammıtinde ádiletti álem men kelisim úshin álemdik birlik týraly bastama kóterdi. Onda usynylǵan qaýipsizdiktiń jańa paradıgmasy jahandyq ońtústik pen jahandyq soltústik arasyndaǵy ashyq dıalog ustanymdaryna negizdelgen. Bizdiń óńirlik deńgeıdegi yntymaqtastyǵymyz búkil Evrazııa keńistigindegi ózara is-qımyldy damytýǵa septigin tıgizerine senimdimin», - dedi Qazaqstan Prezıdenti quttyqtaýynda.
Memleket basshysy bizdiń memleketterdiń aldynda shoǵyrlandyrylǵan kúsh-jigerdi talap etetin birqatar jalpy ózekti syn-tegeýrin turǵanyna nazar aýdartady. Olardyń qatarynda halyqaralyq terrorızm, ekstremızm, esirtki tasymaly jáne transulttyq qylmys bar.
«Atalǵan táýekelder kóp jaǵdaıda Aýǵanstandaǵy áskerı-saıası jáne áleýmettik-ekonomıkalyq ahýalǵa baılanysty. Ortaazııalyq memleketter men Úndistan kúsh salatyn birlesken kúsh-jigerdiń mańyzdy núktesi azyq-túlik qaýipsizdigin nyǵaıtý bola almaq. Qazaqstan AÓK ónimderin jetkizýdiń óńirlik habyn qurý úshin qajetti resýrstar men ınfraqurylymǵa ıe. Ózge de salalar sııaqty bul baǵytty damytý kólik qaýipsizdigin qamtamasyz etýge tikeleı baılanysty. Qazirdiń ózinde Qazaqstan Azııa men Eýropa arasyndaǵy qurlyqtaǵy tranzıttik tasymal júıesinde mańyzdy býyn sanalady. Ortalyq jáne Ońtústik Azııa óńirindegi kólik baılanysy máselesin sheshý bizdiń jan-jaqty yntymaqtastyǵymyzdy sapaly jańa deńgeıge shyǵarýǵa qabiletti», - dedi Qasym-Jomart Toqaev.
Prezıdent únemi aqparat pen saraptamalyq baǵalaýlarmen, onyń ishinde óńirlik qaýipsizdiktiń arhıtektýrasyna qatysty jańa ádistermen almasý mańyzdylyǵyna toqtaldy.
«Jalpy, óńirdegi turaqtylyq pen qaýipsizdikti qamtamasyz etip, biz saýda-ekonomıkalyq yntymaqtastyqty odan ary tereńdetý jáne mádenı-gýmanıtarlyq baılanystardy keńeıtý úshin myǵym irgetas qalaımyz. Osyndaı formattaǵy kópjaqty dıalog qazirgi zamanǵy syn-tegeýrinderge únqatý boıynsha birlesken is-sharalardy júzege asyrý úshin laıyqty alańǵa aınalaryna senimdimin», - dep túıindeıdi Memleket basshysy quttyqtaýyn.