Elordada Ulttyq sport túrlerinen kezekti festıval bastaldy
«QR Ulttyq sport túrlerinen festıvali altynshy ret Astana tórinde bastaý aldy. Ulttyq sporttyń qaınar kózi ulttyq qundylyqtar men jaýyngerlik ónerge baryp tireledi. Ǵasyrlar synynan ótken mergendik, balýandyq, zerektik, eptilik óneriniń búgingi qaıta jańǵyrǵan beınesi –ulttyq sport túrleri. Ulttyq sport túrlerinen ótetin tórtjyldyqtyń basty jarysyn qazir ulttyq sporttyń ishki olımpıadasy dep te ataýǵa bolady. Festıval sońǵy ret 2019 jyly Aqtóbe qalasynda ótip, Túrkistan oblysy, Astana qalasy, Aqmola oblysy úzdik atanǵan bolatyn», - dedi Ulttyq jáne at sporty túrleri ortalyǵynyń dırektory Baqdaýlet Sábıtov OKQ-de ótken brıfıngide.
Spıker atap ótkendeı, festıval qorytyndysy boıynsha elimizdegi ulttyq sportty joǵary deńgeıde damytyp otyrǵan úzdik 3 óńir anyqtalady. Festıvalge qatysýǵa 17 oblys pen 3 qaladan 1 362 sportshy tirkelgen.
Ulttyq sport jankúıerleri 4-10 kúnderi J.Úshkempirov atyndaǵy jekpe-jek qazaq kúresin, «Qazaqstan» jeńil atletıka sport kesheninen asyq atý men toǵyzqumalaq, al «Aspan» sport kesheninen jekpe-jek sportyn tamashalaı alady.
Buǵan qosa, kókpar, báıge, teńge ilý, jamby atý, aýdaryspaq, dástúrli sadaq atý, qusbegilik boıynsha saıystar «Qazanat» ıppodromynda ótedi.
Eske salaıyq, bıyl aqpanda Ulttyq sport qaýymdastyǵynyń prezıdenti Islambek Saljanovty qabyldaǵan Prezıdent Qasym-Jomart Toqaev Dúnıejúzilik kóshpendiler oıyndaryn kelesi jyly joǵary deńgeıde ótkizýdi tapsyrǵan edi.