Elordada úleskerlerdiń aqshasyn qabyldaý quqyǵy joq qurylys salýshylar tizimi jańardy

ASTANA. QazAqparat - Astanada qurylystyń bastapqy satysyndaǵy úleskerlerdiń aqshasyn tartýǵa tıisti ruqsaty joq qurylys uıymdarynyń tizimi jańardy, dep habarlaıdy QazAqparat elorda ákimdiginiń resmı saıtyna silteme jasap.

Qoldanystaǵy zańnamany aınalyp ótý kezinde jasalǵan barlyq mámileler, onyń ishinde aldyn ala brondaý sharty, rezervteý sharty, ınvestıtsııalaý sharty, talap etý quqyǵyn basqaǵa berý sharty tizimde kórsetilgen kóppáterli turǵyn úı keshenderinde jaramsyz bolyp tabylady.

Azamattardyń qarajatyn saqtaý úshin Astana ákimdigi qyraǵy bolýdy suraıdy jáne ruqsat berý qujattary (qurylysqa ruqsat, «Jobalardyń memlekettik vedomstvodan tys saraptamasy» ShJQ RMK oń qorytyndysy) bolmaǵan kezde turǵyn úı satyp alýdan bas tartqan jón.

Esterińizge sala keteıik, úleskerlerdiń qarajatyn tıisti ruqsatsyz qabyldaýǵa «Turǵyn úı qurylysyna úlestik qatysý týraly» Qazaqstan Respýblıkasynyń zańnamasymen tyıym salynady, bul rette Qazaqstan Respýblıkasynyń Ákimshilik quqyq buzýshylyq týraly Kodeksiniń 320-baby, sondaı-aq Qazaqstan Respýblıkasy Qylmystyq kodeksiniń 214-baby boıynsha kásipkerlik qyzmettiń tyıym salynǵan túrlerimen aınalysqany úshin jaýapkershilik kózdelgen.

Barlyq suraqtar boıynsha Astana qalasy, Saryarqa aýdany, Beıbitshilik kóshesi 9 mekenjaıy boıynsha «Astana qalasynyń Qalalyq orta sapasy jáne baqylaý basqarmasy» MM-ne habarlasýyńyzdy suraımyz. Baılanys telefony: 8 (7172) - 55-04-28, 55-67-03.

Úleskerlerdiń aqshasyn qabyldaý quqyǵy joq qurylys kompanııalardyń tizimi siltemede keltirilgen.