Elordada TJ rejımi kezinde 7 qarý tárkilendi
«Osy jyldyń 19 qańtary kúni saǵat 00:00-den bastap elordada tótenshe jaǵdaı rejımi men komendanttyq saǵat aıaqtaldy. Qaladaǵy jedel jaǵdaı turaqty jáne baqylaýda tur. Tótenshe jaǵdaı rejımi bastalǵannan beri qoǵamdyq tártipti qamtamasyz etý, qylmystar men ózge de quqyqqa qaıshy áreketterdiń ýaqtyly aldyn alý jáne jolyn kesý maqsatynda garnızonnyń jeke quramy jumys atqardy. 6 blokpost táýliktik rejımge kóshirildi. Blokbeketter men qala ishinen tekseris barysynda 7 qarý, oq-dáriler jáne 72 sýyq qarý tárkilendi. Sonymen qatar 11 esirtki qylmysynyń joly kesildi», - dep atap ótedi vedomstvodan.
Departament málimetinshe, tótenshe jaǵdaı rejımin buzǵany úshin 651 adam ákimshilik jaýaptylyqqa tartyldy. Olardyń ishinde óreskel zań buzýshylyqqa barǵan 42-si qamaýǵa alynyp, 198-ine aıyppul salyndy. qalǵandaryna eskertý berildi. Tártip saqshylary aýlalar men páterlerdi aralap, tekserý jumystaryn júrgizdi. Kóshi-qon zańnamasyn buzǵany úshin 76 sheteldik azamat elden shyǵaryldy.
Polıtseıler jergilikti-reıdtik is-sharalardy ótkizý barysynda «komendanttyq saǵat» rejımin buzyp, qyzmetin jalǵastyrǵan kóńil kóterý mekemelerin de anyqtady. Nátıjesinde 64 kásipkerlik sýbektisiniń jumysyna tosqaýyl qoıyldy. Sondaı-aq alkogoldik ónimderdi satqan-satpaǵanyn anyqtaý úshin dúkenderge de tekseris júrgizildi.
Tótenshe jaǵdaı kezeńinde «102» arnasyna kelip túsken qońyraýlar sany artty. Olardyń basym kópshiligi anyqtamalyq sıpatta boldy. Qylmys pen ózge de quqyq buzýshylyqtyń sany edáýir azaıdy.
«Osy qıyn kúnderi ishki ister organdary men Qorǵanys mınıstrliginiń jeke quramy qoǵamdyq tártipti qamtamasyz etti. Azamattar ótkizilip jatqan is-sharalarǵa túsinistikpen qarap, qoldaý bildirip, úlken kómek kórsetti. Barlyq qala turǵyndaryna, qoǵamdyq uıymdar men eriktilerge sheksiz alǵysymdy bildiremin. Birlesken jáne júıeli jumystyń arqasynda elordamyzdaǵy tártip pen tynyshtyqty saqtadyq», - dedi elordalyq Polıtsııa departamentiniń bastyǵy general-maıor Erjan Sadenov.