Elordada turmystyq zorlyq-zombylyq kórsetý faktisi 1,5 ese azaıdy

NUR-SULTAN. QazAqparat – Nur-Sultan qalasynda otbasynda shý shyǵaryp, kúsh kórsetýshilerdiń sany kemigen. Bul týraly Nur-Sultan qalasy polıtsııa departamenti jergilikti polıtsııa qyzmeti basqarmasynyń basshysy Arman Aıtmaǵambetov málim etti, dep habarlaıdy QazAqparat tilshisi.

«Bizdegi statıstıkaǵa sáıkes sońǵy jyldary otbasynda zorlyq-zombylyq kórsetý jaǵdaıy 1,5 ese azaıǵan. Otbasylyq kıkiljińniń deni ishimdiktiń saldarynan bolyp jatady. Jábir kórýshilerdiń 54 paıyzy áıelder. Otbasynda jıi kıkiljiń shyǵaryp, kúsh kórsetetin jandarmen jumys isteýdiń ózindik ádis-tásili bar. Bizdiń mamandar olardy jumys barysynda qoldanyp jatyr. Jyl basynan beri turmystyq kıkiljiń týdyryp, jeke bas quqyǵyn elemegen 1600 buzaqy ákimshilik jazaǵa tartyldy», - dedi Arman Aıtmaǵambetov polıtsııa departamentinde ótken baspasóz máslıhatynda.

Polıtsııa departamenti bergen derekke sáıkes 2021 jyly elordada 62 otbasylyq zorlyq-zombylyq jasaý faktisi tirkelgen.

«Sonymen qatar 3716 otbasynda búlik shyǵaratyn buzaqydan qorǵaý jazbasy alyndy. 141 azamatqa ishimdik ishýge zańmen tyıym salyndy. Biz bul baǵytta úkimettik emes uıym ókilderimen birlesip jumys istep jatyrmyz. Odan bólek, búginde elordadaǵy daǵdarys ortalyǵynda 13 áıel men 38 bala bar», - deıdi ol.

Buǵan deıin habarlaǵanymyzdaı otbasynda zorlyq-zombylyq kórip júrgen jandar polıtsııaǵa arnaıy qupııa sóz arqyly basynda bolǵan jaǵdaı týraly aıta alady. Qupııa sózdi polıtsııa ınspektorlarynan suraý kerek.