Elordada túrmege jetkizilgen torttyń ishinen uıaly telefon tabyldy

NUR-SULTAN. QazAqparat – Nur-Sultan qalasynda túzeý mekemesine jetkizilgen torttyń ishinen «tosynsyı» tabyldy, dep habarlaıdy QazAqparat Polisia.kz saıtyna silteme jasap.

Nur-Sultan qalasy Qylmystyq-atqarý júıesi departamentine qarasty ETs-166/10 mekemesiniń tekserý toby jazasyn ótep jatqan sottalǵan azamatqa jiberilgen sálem-saýqattyń, atap aıtqanda torttyń arasynan uıaly telefon tapty.

Kondıterlik ónim arnaıy qurylǵy – metallodetektormen tekserilgen.

«Tort syılyq jetkizilgen sottalǵan azamattyń kóz aldynda týralyp, onyń ishinen tyıym salynǵan zat – sý jańa uıaly telefon alyndy. Bul fakti boıynsha sottalǵandy jáne «tátti syılyqty» jetkizgen azamatty jaýapkershilikke tartý úshin tıisti tekserýler júrgiziletin bolady», - delingen saıtta.