Elordada túrmeden shyqqandarǵa aqshalaı kómek berilmek

NUR-SULTAN. QazAqparat – Nur-Sultan qalasynyń ákimdigi túrmede jazasyn ótep shyqqan azamattarǵa 47,7 myń teńge kóleminde birjolǵy áleýmettik kómek kórsetýdi josparlap otyr. Bul týraly qalalyq Jumyspen qamtý jáne áleýmettik qorǵaý basqarmasynyń basshysy Ilıa Skýb málim etti, dep habarlaıdy QazAqparat tilshisi.

«Qurmetti depýtattar, nazarlaryńyzǵa jekelegen sanatqa jatatyn azamattardy áleýmettik kómekpen qamtý týraly jobaǵa ózgeris engizý usynylyp otyr. Atap aıtqanda, áskerı ardagerlerge beriletin birjolǵy áleýmettik tólemniń kólemin 20 AEK-ten 35 AEK-ke (1 AEK – 3180 teńge) arttyrý. Atalǵan áleýmettik shara 800 adamǵa qatysty. Sonymen qatar alǵash ret túrmeden bosap shyqqan azamattarǵa 15 AEK kóleminde birjolǵy tólem berýdi usynyp otyrmyz», - dedi Ilıa Skýb qalalyq máslıhattyń kezekten tys sessııasynda.

Onyń aıtýynsha, birjolǵy tólemdi alý úshin túrmeden shyqqan soń 6 aıdyń ishinde ótinish berilýi tıis.

«Azamattardy áleýmettik kómekpen qamtýǵa qatysty usynylǵan joba Qazaqstan Respýblıkasynyń zańnamalaryna qaıshy emes. Sol sııaqty quqyqtyq aktilerge qoıylǵan talaptarǵa sáıkes keledi. Jobaǵa engizilgen ózgeristerdi qoldaýdy suraımyz», - deıdi ol.

Buǵan deıin qalalyq máslıhattyń kezekten tys sessııasynda elorda ákimdigi 713 mln teńgege segiz qurylys nysanyn satyp alatyndyǵy aıtyldy.