Elordada Túrkistan teatry plastıkalyq spektakl qoıdy
«Qorqyt týraly ańyz» jazýshy-dramatýrg Ermek Amanshaevtyń lıbrettosy boıynsha qoıylǵan. Bı qımyldaryn reseılik baletmeıster Konstantın Semenov sahnalaǵan. Plastıkalyq spektakldiń ereksheligi – ártister oqıǵany, keıipkerlerdiń ishki sezimderin bı qımyldary arqyly baıandaıdy. Qoıylym áýenderin kompozıtor Hamıt Shanǵalıev jazǵan.
«Túrkistan mýzykalyq drama teatrynyń ashylǵanyna az ýaqyt ótse de, respýblıkaǵa tanymal bola bastady. Bul Nur-Sultanǵa ekinshi gastroldik saparymyz, oǵan deıin biz Q. Qýanyshbaev atyndaǵy memlekettik akademııalyq qazaq mýzykalyq drama teatrynda Dýlat Isabekovtyń «Bórte» tarıhı dramasyn qoıdyq, endi «Astana Operanyń» tamasha sahnasynda óner kórsetý biz úshin úlken mártebe. Barsha kórermenderdi 27-28 tamyzda zamanaýı bı men operany biriktirgen «Qorqyt týraly ańyz» plastıkalyq spektaklinde jas teatrdyń ónerin baǵalaýǵa shaqyramyz, - deıdi Túrkistan mýzykalyq drama teatrynyń dırektory ári kórkemdik jetekshisi Aınur Kópbasarova.
Spektakl kóshpeli halyqtar tarıhynda tereń iz qaldyryp, qundy ádebı-mýzykalyq mura jasaǵan Qorqyt atanyń ómirin baıandaıdy. Qoıylymda Qorqyt alyp qaraǵashtan oıyp qobyz jasaıdy, bul aspap óziniń sıqyrly únimen aınalasyn úndestik pen saýlyqqa jeteleıdi. Alaıda qobyzshynyń ómir jolynda kóptegen synaqtar kezdesedi. Qaıda barsa da, qaıda kóship-qonsa da, ajaldyń elesi sońynan qalmaıdy. Qıyn joldan ótken soń aqyry Qorqyt týǵan jerine oralady.
Bul spektaklde izgilik nuryn shashqan Qorqyt pen jer betin arazdyqqa toltyrýǵa tyrysqan sıqyrshy Martýdyń arasyndaǵy máńgilik qaqtyǵys zamanaýı horeografııa tilimen áserli beınelenedi. Qoıylym rejısseri Konstantın Semenov Qorqyttyń tutas túrki álemi úshin mańyzdy tulǵa ekenin, týyndyǵa asqan jaýapkershilikpen qaraǵanyn aıtty.
«Spektakl jasaýda eki taqyrypqa basa mán berdik. Birinshisi – Qorqyt aty ańyzǵa aınalǵan qobyz aspabyn jasady, ol mýzyka arqyly adamdarǵa úndestik syılaıdy. Ekinshi taqyryp – onyń adamdarǵa degen janashyrlyǵy. Ólim sózsiz jáne ólimmen kúresý áreketteri, onyń ólimdi qabyldaý arqyly aspanǵa aparatyn joldyń kiltin tabatyny kórsetilgen. Meni osy jobaǵa tartqanyma óte qýanyshtymyn. Meniń oıymsha, spektakl qyzyqty, ınnovatsııalyq, kópkomponentti bolyp shyqty, sebebi beıneproektsııa men mol jaryq qoldanyldy. Ártister úshin bul jańa bir beles boldy, sebebi spektakl tutastaı plastıkaǵa negizdelgen», - dep bólisti Konstantın Semenov.
Qoıylymda zamanaýı tehnologııalar men arnaıy effektilerdi qoldaný – Túrkistan teatrynyń basty ereksheligine aınaldy. Qorqyt spektaklinde de jańbyr men tuman syndy tabıǵat qubylystary dybystyq, vızýaldyq effektilermen kórsetiledi.
Elordada 27-28 tamyz kúnderi eki kún qatarynan Túrkistan mýzykalyq drama teatrynyń daryndy ártisteri Elaman Ábdiqalyq, Erkinbek Áýbákirov, Akylaı Sydygalıeva, Alına Ormonbek, Rýstam Shaıhov, Gúljanat Qalamǵazına, Baqytnur Dúısenbaeva, Mao Sakaı, Farhat Sadýaqasov, Dastan Sattar, Ilıas Djarlykasymov, Alýa Tóregeldi, Kamıla Alımjanova, Madına Sadýbaeva, Bekarys Qaraǵýlov, Danııar Dosymbek, Almas Jylqybek, Ferıde Tolobaeva, Dáýlet Shomanov óner kórsetedi.
Eske sala keteıik, ótken jyly Túrkistan mýzykalyq drama teatry tanymal «Bórte» spektaklin kórermen nazaryna usynǵan bolatyn.