Elordada turǵyn úı qurylysynyń qarqyny úsh ese baıaýlaıdy

<p>Astanada bir jylda 11 mln sharshy metr turǵyn úı salynyp kelgen. Endi osy qarqyn baıaýlap, jylyna 3-3,5 mln sharshy metr baspana salý josparlanyp otyr. Jibek Joly telearnasyna <a href="https://www.youtube.com/watch?v=o0U-SU0U8gU" target="_blank" rel="noopener">suhbat bergen</a> qala ákimi Jeńis Qasymbek osyndaı josparyn ortaǵa saldy, dep habarlaıdy <a href="https://kaz.inform.kz/" target="_blank" rel="noopener">Kazinform</a>.</p>

«Qazir ákimshilik eki ortada. Myna jaǵynda qurylys kompanııalary tur. Olar qazir qalaǵa 100 myńnan astam turaqty jumys ornyn berip otyr. Ony saqtaý kerek jáne qoldaý kerek. Qaladaǵy ınvestıtsııanyń jartysy qurylysqa tartylady. Onyń ishinde turǵyn úı qurylysy ǵana emes, kólik ınfraqurylymy, ónerkásip jáne basqasy bar. Ekinshi jaǵynda úleskerler – qalanyń turǵyndary, Qazaqstan azamattary tur. Sondyqtan eki jaqty da túsinip, ekeýine de kómek berý kerek. Qazirgi kúni mysaly, 102 zańsyz qurylys boldy deımiz ǵoı, qujattaryn rettep, zańdy túrde qurylysyn jalǵastyratyn kompanııalardyń sany ózgerip jatyr. Qujaty durys emes, áli de formaldy turǵydan zańsyz salyp jatqan kompanııalardyń sany 3 ese azaıdy. Biraq osy jyldyń ishinde bul máseleni tolyǵymen sheshemiz dep josparlap otyrmyn», - dedi ol.

Jeńis Qasymbek budan bylaı Astanada turǵyn úı qurylysyna jer alý qıyndaıtynyn eske saldy.

«Jer alý óte qıyn bolady. Memlekettik saraptamasy joq bir de bir kompanııa kele almaıdy. Jer máselesi tolyǵymen, 100 paıyz sheshilmese, ol da kele alamaıdy. Mysaly, eski garajdardyń, burynǵy saıajaılardyń aýmaǵyn úlken kompanııalar satyp alady da, qurylysqa kirisedi. Ol jerde bir-eki gektar jer bolýy múmkin. Garajdyń 95 paıyzyn satyp alyp, 5 paıyzymen baǵasyna kelispese de, qurylysty bastap ketedi. Sonyń kesirinen aýlanyń qaq ortasynda 5-6 jekemenshik garaj turady. Ol zańdy emes. Saıajaı bolsa, onda bireý turady. Qalaǵa problemany qoldan týǵyzyp berip otyr. Biz ondaı úıdi qabyldaı almaımyz. Halyq kórip otyr. «Úı bitti ǵoı, nege kilt bermeıdi?» deıdi. 1991 jyly «Jıle-91» degen baǵdarlama bolatyn. Qazaqstan boıynsha 6 mln sharshy metr úı salynatyn. Qazir bir qalada 11 mln sharsh metr salynyp otyr. Óz josparymyz boıynsha, jylyna 3-3,5 mln sharshy metrdi qabyldaımyz. Osy 3 mln sharshy metrge salynyp jatqan ınfraqurylym jetkilikti bolady», - dedi Astana ákimi.