Elordada tuńǵysh ekologııalyq teatr ashyldy
«EcoQolday» degen at alǵan balalar teatrynyń ashylýyna Ekologııa, geologııa jáne tabıǵı resýrstar mınıstrliginiń, Nur-Sultan qalasy bilim basqarmasynyń ókilderi, ÓKM operatory, men elorda mektepteriniń oqýshylary, ekobelsendiler men ata-analar qatysty.
Mamyr aıynda teatr kórermenderge ekologııalyq ertegige negizdelgen eki spektakl usynýdy josparlap otyr. Spektakldi kórýge nemese akterlik sheberlik kýrstaryna qatysýǵa bılet satyp alýdyń joly ońaı. Ol úshin makýlatýra, plastık jáne shyny qaldyqtaryn suryptap, qaıta óńdeý oryndaryna tapsyrý kerek. Sondaı-aq, ınklıýzıvti bilim berýdi damytý aıasynda teatr janynan «Eko-sheberhana» áleýmettik jobasy iske qosylyp otyr. Bul joba aıasynda jas urpaqtyń boıyna turmystyq qaldyqtardy suryptap tógý mádenıetin sińirý kózdelgen.
«EcoQolday» jobasy ÓKM operatorynyń bastamasymen Nur-Sultan qalasy ákimdiginiń, «Jas Ulan» RQB, «Adal Nıet» qory men «Clean City NC» kompanııasynyń qoldaýymen iske asyrylyp otyr.
«Jas Ulan» biryńǵaı balalar men jasóspirimder uıymy» respýblıkalyq qoǵamdyq birlestiginiń atqarýshy dırektory Aqnur Turdalıeva jobanyń negizgi maqsaty – jas urpaqqa ekosanaly ómirdi nasıhattaý, ekologııalyq tárbıe berý, qoqysty suryptaý boıynsha qyzyqty aqparattardy túsindirý ekenin aıtady.
«Búgingi is-shara Azamattyq bastamalardy qoldaý ortalyǵy men Aqparat jáne qoǵamdyq damý mınıstrliginiń qoldaýy arqasynda jasalyp jatyr. «Óndirýshilerdiń keńeıtilgen mindettemeleri» operatory seriktes retinde kómek kórsetýde. Granttyq qarjylandyrý arqyly iske asyryp otyrmyz. Teatrdyń turaqty ǵımaraty joq. Sahnasy kóshpeli deýge bolady. «Grıneıkterdiń basynan keshkenderi» deıtin bes kitap eki tilde shyǵarylǵan bolatyn. Ekologııa, qoqysty suryptaý taqyrybyna arnalǵan ertegiler jınaǵy bul. Teatr qoıylymdary sol ertegilerdiń sıýjetine qurylady», - deıdi joba jetekshisi.
Onyń aıtýynsha, keleshekte teatrdyń súıemeldeýimen mektepter arasynda ekologııa taqyrybyn qamtyǵan sıýjetter men spektaklderdiń baıqaýy uıymdastyrylmaq.
«Jarys eki tilde bolady. Sıýjetter men stsenarıler eki tilde jazylady. Bul spektaklderge eki aıdaı daıyndaldyq. Qazir teatr quramyna mektep oqýshylary men Delfı komıtetiniń akterleri men rejıserleri tartylǵan. Keleshekte teatrdyń tájirıbesin ózge óńirlerge taratamyz. Qoıylym ınklıýzıvti bilim oshaqtarynyń shákirtteri úshin aqysyz bolady», - deıdi Aqnur Turdalıeva.
Jobany uıymdastyrshy Ulttyq Delfıı komıtetiniń dırektory Quralaı Túspekova búgingi birinshi qoıylymǵa Nur-Sultan qalasyndaǵy №83 mekteptiń oqýshylary qatysyp jatqanyn aıtty.
«Aldaǵy ýaqytta eksprom-teatr formatynda jumys isteýdi josparlap otyrmyz. ıAǵnı, qózge mektepterdiń de oqýshylary kelip, eki-úsh saǵat ishinde spektaklderge qatysady. Sol arqyly balalardyń ekologııalyq bilimin arttyrmaqshymyz.
Búgin qoıylymnan keıin balalarǵa arnalǵan master saǵaty ótedi. Ol sharada plastıkalyq bótelkelerden gúl qumyralaryn, ózge de kórneki zattardy jasaýdy úıretemiz. Gúl egý jáne ony kútýdiń qupııalaryn da úırenip shyǵady», - dedi Ulttyq Delfı komıtetiniń dırektory.