Elordada tótenshe jaǵdaı rejımin buzǵan 200 adam jazalandy

NUR-SULTAN. QazAqparat – Nur-Sultan qalasynda tótenshe jaǵdaı erejesine baǵynbaǵan 200 adam jaýapkershilikke tartyldy. Bul týraly Nur-Sultan qalasy polıtsııa departamentiniń basshysy, elordanyń komendanty Erjan Sádenov málim etti, dep habarlaıdy QazAqparat tilshisi.

«Qurmetti qala turǵyndary, elordada ahýal turaqty. Táýlik ishinde 8 qylmys tirkeldi. 83 jol-kólik oqıǵasy bolyp, saldarynan 2 adam jaraqat aldy. Sol sııaqty 464 ákimshilik quqyqbuzýshylyq anyqtaldy. Onyń ishinde 183 - qalada turý erejesin buzý boıynsha, 36 - qoǵamdyq orynda ishimdik ishý jáne kóshi-qon erejesin buzý boıynsha 18 derek tirkeldi», - dedi Erjan Sádenov Facebook paraqshasynda.

Onyń aıtýynsha, elorda aýmaǵynda 6 blok-beket ornatylyp, tártip saqshylary qala qaýipsizdigin qamtamasyz etip tur.

«Tótenshe jaǵdaı rejımin buzǵan 200 adam jaýapqa tartyldy. Atap aıtqanda, 28 turǵyn ákimshilik qamaýǵa alyndy», - deıdi ol.

Buǵan deıin elorda komendanty tótenshe jaǵdaı rejımi jarııalanǵan kúnnen bastap polıtseıler, QR Ulttyq ulany men Qorǵanys mınıstrliginiń áskerı qyzmetshileri táýlik boıy qala qaýipsizdigin qamtamasyz etip turǵanyn aıtqan edi.