Elordada Táýelsizdiktiń 30 jyldyǵyna oraı qysqy júgirý jarysy ótti

NUR-SULTAN. QazAqparat - Elordadaǵy trıatlon saıabaǵynda Qazaqstan Respýblıkasy Táýelsizdiginiń 30 jyldyǵyna oraı qysqy júgirý jarysy ótti, dep habarlaıdy QazAqparat qala ákimdiginiń resmı saıtyna silteme jasap.

«Qysqy jugiru» jarysynyń negizgi qashyqtyǵy 10 shaqyrymdy qurady. Jarysqa 250-ge jýyq qala turǵyny men qonaqtary jáne sport áýesqoılary qatysty.

Іs-sharaǵa QR Mádenıet jáne sport vıtse-mınıstri Serik Jarasbaev, MSM Sport jáne dene shynyqtyrý isteri komıtetiniń tóraǵasy Samat Erǵalıev, Nur-Sultan qalasynyń trıatlon Federatsııasynyń Prezıdenti Erjan Birjanov jáne Nur-Sultan qalasynyń Dene shynyqtyrý jáne sport basqarmasynyń basshysy Samat Jylqybaev qatysyp, berilgen on shaqyrymdy jarys qatysýshylarymen birge baǵyndyrdy.

«Qaıyrly tań, qurmetti jarys qatysýshylary! El Táýelsizdiginiń 30 jyldyǵyna arnalǵan qysqy júgirý jarysyna qosh keldińizder. Elordalyq turǵyndar buqaralyq sportty damytýǵa erekshe kóńil bóledi. Sonyń dáleli búgin mine, qala turǵyndary jáne áýesqoı sportshylar trıatlon saıabaǵynda ótip jatqan qysqy júgirýge qatysýda. Barshańyzǵa sáttilik, jeńis tuǵyrynan kórinýlerińizdi tileımin. Aldaǵy kele jatqan merekeler qutty bolsyn!»,- dedi QR Mádenıet jáne sport vıtse-mınıstri Serik Jarasbaev.

«Qysqy jugiru» jarysynyń qatysýshylary 5 jas erekshelikteri boıynsha synǵa tústi. Atap aıtaq: 18-29 jas; 30-39 jas; 40-49 jas; 50-59 jas; 60 jas jáne odan joǵary.

«Búgin áýesqoı sportshylardyń basyn biriktirip, jańa jyldyń aldynda júgirý ótkizdik. Qatysýshylardyń sany 250-ge jýyq. Qashyqtyq- 10 km. Maqsaty—qala turǵyndaryn sportqa baýlý. Qazirgideı qıyn kezde sportpen aınalysqan adamdar az aýyrady. Sondyqtan, barlyqtaryńyzdy sportpen shuǵyldanýǵa shaqyramyz»,- dedi qalalyq Trıatlon Federatsııasynyń prezıdenti Erjan Birjanov.

Jarystyń basty maqsaty – elordada buqaralyq sportty damytý, Nur-Sultan turǵyndary men qonaqtary arasynda salaýatty ómir saltyn nasıhattaý, ult densaýlyǵyn jaqsartý.

«Búgin jarys tamasha ótti dep aıtýǵa bolady. Aýa raıyna baılanysty kishkene muz boldy, soǵan qaramastan jarystyń uıymdastyrylǵanyna úlken raqmet aıtam. Jarys tamasha boldy»,-dedi qatysýshy Aqas Qaldybek.

Márege jetken árbir qatysýshyǵa fınıshorlyq medali tabystalyp, ár jas sanattaǵy jeńimpazdar sertıfıkattarmen jáne baǵaly syılyqtarmen marapattaldy.

Aıta keteıik, jarys barlyq sanıtarlyq normalar men karantın talaptaryn saqtaı otyryp ótti.