Elordada Táýelsizdik kúnine oraı avtosherý ótti

ASTANA. QazAqparat – Astanada memlekettik tý taǵylǵan 30-dan astam jeńil kóliktiń qatysýymen avtosherý uıymdastyryldy, dep habarlaıdy QazAqparat tilshisi.

«Táýelsizdik 31 jyldyǵyna oraı qala ákimdiginiń uıytqy bolýymen avtosherý ótip jatyr. Atalǵan shara sońǵy 5 jyl boıy turaqty uıymdastyrylyp keledi. Avtosherýge 30-dan astam jeńil kólik qatysýda. Ár kólikke memlekettik tý taǵylǵan. Búgingi sharaǵa belsendi azamattar, jastar jáne volonterler qatysyp jatyr», - dedi Astana qalasy ákimdiginiń jastar saıasaty basqarmasynyń bólim basshysy Aıan Ermentaev.

Avtosherý qatysýshylary memlekettik rámizder alańynan bastap «Otan qorǵaýshylar» monýmentine deıin 31 shaqyrymdy júrip ótedi.

«Búgingi shara Táýelsizdik kúnine arnalyp otyr. Odan bólek, merekege oraı elorda jastarynyń qatysýymen mádenı jáne sporttyq is-sharalar ótedi. Osy oraıda astanalyqtardy Táýelsizdik kúnimen quttyqtaı otyryp, merekelik sharalarǵa shaqyramyz», - deıdi ol.