Elordada Talǵat Bıgeldınovtiń qurmetine júgirýden jarys ótti

ASTANA. QazAqparat – Elordadaǵy trıatlon parkinde dańqty ushqysh eki márte Keńes Odaǵynyń Batyry avıatsııa general-maıory Talǵat Bıgeldınovtiń 101 jyldyǵyna oraı júgirý sporttyq is-sharasy ótti, dep habarlaıdy QazAqparat Qorǵanys mınıstrligi baspasóz qyzmetine silteme jasap.

Erler men áıelder arasyndaǵy jarys eki jas sanatynda, 10,1 jáne 5 shaqyrym boıynsha ótti.

Іs-shara «Atamnyń amanaty» qoǵamdyq birlestiginiń bastamasymen Qorǵanys mınıstrligi, Ulttyq ulan jáne elorda ákimdiginiń qoldaýymen uıymdastyryldy. Oǵan 700-den astam adam qatysty. Olardyń arasynda Aqmola garnızonynyń, Shekara qyzmetiniń, Ulttyq ulannyń áskerı qyzmetshileri, Qarýly kúshterdiń ardagerleri, kásibı sportshylar men sport súıer qaýym bar.

Áýe qorǵanysy kúshteriniń bas qolbasshysy avıatsııa general-maıory Dáýren Qosanov jarysqa qatysýshylarǵa arnap sóz sóıledi.

«Biz bul sharany dańqty ushqysh, áýe shaıqasynyń sheberi avıatsııa general-maıory Talǵat Bıgeldınovke arnadyq. Bizdiń kýrsanttar 22 jasynda tek ınstýtty aıaqtap jatady, al ol osy jasta Keńes Odaǵynyń Batyry atandy. Ol 300-den asa jaýyngerlik ushý oryndap, jaýdyń 7 ushaǵyn atyp túsirgen. Onyń ómiri – batyldyqtyń, tabandylyqtyń jáne Otanǵa janqııarlyqpen qyzmet etýdiń úlgisi», – dep atap ótti D. Qosanov.

Jarys aldynda Qorǵanys mınıstrliginiń, Qarýly kúshterdiń, Shekara qyzmeti men Ulttyq ulannyń qurylymdyq bólimsheleriniń atynan qatysqan áskerı qyzmetshiler júgirdi.

18-49 jas aralyǵyndaǵy erler arasynda 10,1 shaqyrym qashyqtyqty jarystyń qorytyndysy boıynsha birinshi bolyp kelgen – Álimjan Baltabek, ekinshi oryndy Damır Ábdirahmanov, úshinshi oryndy Sultan Bazarbaev ıelendi. Osy jas sanatyndaǵy áıelder arasynda Janna Áljanova úzdik dep tanyldy, Alısa Kraft jáne Alena Aqymbekova osy úshtikke ilindi.

50 jastan asqan erler arasynda Rınat Salıkjanov birinshi oryn alsa, Lorens Rossov ekinshi, Arsan Júzenov úshinshi oryndy qanjyǵalaryna baılady. 50 jastan asqan áıelder arasynda Sonıa Veksteın jeńimpaz atandy.

18-49 jas aralyǵyndaǵy erler arasynda 5 shaqyrym qashyqtyqta Dáýlet Sádýaqasov máre syzyǵyn birinshi bolyp kesip ótti. Odan keıin Arhat Qaldybek kelse, úshinshi bolyp Beıbit Ahmýrov márege jetti. Osyndaı sanattaǵy áıelder arasynda Dına Jákenova jeńiske jetse, ekinshi orynǵa Madına Berqalıeva, al úshinshi orynǵa Lýnara Bekeeva taban tiredi.

50 jastan asqan erler arasynda Eleýsiz Pardabaı jeńiske jetse, ekinshi oryndy Sáken Gýbashev, úshinshi oryndy Abaı Tasbolatov ıelendi. Odan ózge 50-den asqan áıelder arasynda Gúlmıra Turlyhanova jeńis tuǵyrynan kórindi.

Jarys qatysýshylaryna mılıtarı úlgisindegi fýtbolkalar men aty ańyzǵa aınalǵan ushqysh basqarǵan shabýyldaýshy ushaq túrindegi medaldar tabys etildi.

Іs-shara aıasynda Qorǵanys mınıstrligi men Ulttyq ulannyń áskerı ansamblderi, elordanyń shyǵarmashylyq ujymdary men qurmet qaraýyl rotasynyń defılesi kórsetildi.