Elordada taksıst mas jolaýshynyń 550 myń teńgelik altyn saǵatyn urlaǵan
Nur-Sultan qalasy Polıtsııa departamentiniń baspasóz qyzmetiniń málimetinshe, úıine qonaqtan mas kúıde oralǵan elorda turǵyny qolyndaǵy 550 myń teńgelik «ıAshma» markaly altyn saǵaty joq ekenin baıqaǵan.
«Qonaqtan túndeletip shyqqan ol «Toyota Camry» kóligin toqtatyp, taksı retinde paıdalanǵany belgili boldy. Artqy oryndyqta otyrǵan jolaýshy kóp ótpeı uıyqtap ketken. Dittegen mekenjaıǵa jetkende kólik tizginshisi jolaýshyny oıatý kezde, qolyndaǵy altyn saǵatyn sheship alǵan. Saǵatyn úıge kelgennen keıin ǵana joqtaǵan er adam birden polıtsııaǵa júgindi», - dep jazady departamenttiń baspasóz qyzmeti.
Jedel-izdestirý kezinde polıtsııa qyzmetkerleri 40 jastaǵy kúdiktini ustaǵan.
«Jeke tasymaldaýmen aınalysatyn er adam kinásin moıyndady. Zattaı aıǵaq tárkilenip, onyń elorda aýmaǵynda buryn jasalǵan uqsas qylmystarǵa qatystylyǵy tekserilip jatyr. Nur-Sultan qalasynyń Polıtsııa departamenti turǵyndardy qyraǵy bolýǵa, qundy zattardy qaraýsyz qaldyrmaýǵa jáne beıtanys adamdarǵa senbeýge keńes beredi», - delingen polıtsııa departamentiniń habarlamasynda.