Elordada taǵy bir saıabaq paıda bolady

NUR-SULTAN. QazAqparat – Qyrqúıekte ótetin Álemdik jáne dástúrli dinder kóshbasshylarynyń VII sezi aıasynda elordada jańa saıabaq ashylady. Búgin onyń tujyrymdamasyn ázirleý boıynsha konkýrs jarııalandy. Bul týraly forýmnyń resmı ókili Nazym Janǵazınova óziniń Facebook paraqshasynda jazdy, dep habarlaıdy QazAqparat tilshisi.

«Sezdi ótkizý aıasynda Qazaqstandaǵy túrli konfessııalar men etnostar arasyndaǵy birliktiń, yntymaqtastyq pen dostyqtyń sımvoly bolatyn tabıǵı-rekreatsııalyq park salynady. Saıabaq el astanasyn abattandyrý men kógaldandyrý isine de yqpal etedi», - dep jazdy Nazym Janǵazınova.

Osyǵan baılanysty sezd hatshylyǵy men elorda ákimdigi elimizdiń sáýletshilerin, landshaft dızaınerleri men ýrbanıst mamandaryn Esil boıynan oryn tebetin saıabaq tujyrymdamasyn ázirleý konkýrsyna qatysýǵa shaqyrady. Eskızdik usynystar 20 tamyzǵa deıin qabyldanady.

Aıta ketsek, elordada 14-15 qyrkúıek kúnderi Álemdik jáne dástúrli dinder kóshbasshylarynyń VII sezi ótedi. Memleket basshysy Qasym-Jomart Toqaevtyń qabyldaýynda bolǵan Parlament Senatynyń tóraǵasy Máýlen Áshimbaev atalǵan sharaǵa daıyndyq barysy jóninde aqparat berdi.

Sondaı-aq, Prezıdent Qasym-Jomart Toqaevtyń shaqyrýymen Álemdik jáne dástúrli dinder kóshbasshylarynyń VII sezine qatysý úshin Rım Papasy Frantsısk Qazaqstanǵa memlekettik saparmen keledi.

QR Syrtqy ister mınıstrligi Rım Papasy Frantsısktiń 13-15 qyrkúıekke josparlanǵan Qazaqstanǵa memlekettik saparynyń baǵdarlamasyn jarııalaǵan bolatyn.