Elordada taǵy bir kópbeıindi balalar aýrýhanasyn salý qajet – mınıstrlik

ASTANA. QazAqparat – Astanada keminde 350 tósek-orynǵa arnalǵan kópbeıindi qalalyq balalar aýrýhanasyn salý qajet. Muny «2023-2027 jyldarǵa arnalǵan elordanyń densaýlyq saqtaý júıesin damytýdyń keshendi josparyn» jarııalaǵan Densaýlyq saqtaý mınıstrligi usyndy, dep habarlaıdy QazAqparat tilshisi.

«Búginde elordada balalar hırýrgııalyq statsıonarynyń tapshylyǵy bar. Elordada emdelgen balalardyń sany jyl saıyn orta eseppen 2 300 jaǵdaıǵa ósip keledi. Balalarǵa hırýrgııalyq kómek kórsetetin jalǵyz statsıonar – 2014 jyly paıdalanýǵa berilgen №2 Kópbeıindi qalalyq balalar aýrýhanasy. Onda 2018 jyldan bastap jasalǵan operatsııalar sany 42%-ǵa ósti. Munda elordanyń irgeles aýdandaryna da kómek kórsetetin jalǵyz balalar jaraqat pýnkti bar. Ol óz kezeginde tasymaldaý ýaqytyna, patsıentterdiń kezek kútýi men halyqtyń shaǵymdarynyń ósý máselesine ákep soǵyp otyr», - dep másele kóterilgen keshendi josparda.

Bul túıtkildi sheshý maqsatynda Densaýlyq saqtaý mınıstrligi Esil men Nura aýdandarynyń aýmaǵynda kópbeıindi aýrýhana salýdy usynyp otyr.

«Táýligine orta eseppen 600-ge jýyq bala shuǵyl kómekke júginedi. Onyń ishinde 183-i jaraqat pýnktine. Joǵaryda aıtylǵandardy taldaı otyryp, Esil jáne Nura aýdandarynyń shekarasyndaǵy aýdany 12 gektar jerge qýaty keminde 350 tósek-oryn bolatyn kópbeıindi qalalyq balalar aýrýhanasyn salý qajettigi bar», - dep usynys jazylǵan qujatta.

Qujat 14 qyrkúıekke deıin kópshilik talqylaýda bolady.