Elordada syrtqy jarnama ornalastyrý erejeleri túsindirildi
«Qazirgi ýaqytta Nur-Sultan qalasynda 2 myńnan astam jarnama qurylymy bar. Olardyń qataryna bılbord, afısha, LED ekran, aıaldama kesheni kiredi. Naqtyraq aıtsam, qalada 95 LED ekran bar. Bir ókinishtisi, sońǵy ýaqytta zańsyz nemese tıisti organdardan kelisim almaı ilingen jarnamalar kóbeıip barady», – dedi oǵamdyq damý isteri basqarmasynyń basshysy Talǵat Rahmanberdi.
Kezdesý barysynda sóz alǵan Onomastıkalyq jumys jáne memlekettik rámizder bóliminiń basshysy Gúljan Qurmanǵalıqyzy zańsyz ári qatege toly jarnamalar úshin aldaǵy ýaqytta salynatyn aıyppul týraly túsindirip berdi.
«Biz jarnama agenttikteri bergen mátindi tekserip, kelisim beremiz. Ákimshilik-quqyqbuzýshylyq kodeksiniń 455-babyna sáıkes aıyppul salý isi qarastyrylǵan. Atalǵan baptyń 3-tarmaǵy boıynsha jarnama taratý tiline belgilengen talapty buzǵany úshin jeke tulǵalarǵa 20 AEK, laýazymdy tulǵalarǵa 70 AEK, shaǵyn kásipkerlik sýbektilerine nemese kommertsııalyq uıymdarǵa 100 AEK, orta kásipkerlik sýbektilerine 150 AEK, al iri kásipkerlik sýbektilerine 400 AEK kóleminde aıyppul salynady. Osyǵan oraı Til týraly zańnyń 21-babyna sáıkes kez kelgen aqparat (onyń ishine jarnama da kiredi) memlekettik tilde jáne orys tilinde bolýy tıis», – dep Gúljan Qurmanǵalıqyzy jarnama agenttiginiń ókilderine eskertý jasady. Jıyn barysynda sóz alǵan qalalyq Polıtsııa departamenti Esirtki qylmysyna qarsy is-qımyl basqarmasynyń bólim bastyǵy Sergeı Ilınyh sońǵy ýaqytta jarnama bılbordtary arqyly esirtki saýdasy jarnamalanyp ketkenin jetkizdi.
«Esirtki bıznesi óz qylmysyn taratý úshin aqparattyq tehnologııany qoldanýda. Osy maqsatta ınternet resýrstaryn, túrli messendjerlerdi paıdalanady», – deıdi Sergeı Ilınyh.
Onyń aıtýynsha, 2019 jyldyń 27 jeltoqsanynan bastap arnaıy zań jobasy engizilgen, onyń negizinde esirtki nemese soǵan uqsas ónimdi nasıhattaǵan, jarnamalaǵan azamat úsh jylǵa deıin, al BAQ betterinde nemese ózge de quraldarda jarııalaǵanǵa 6 jylǵa deıin bas bostandyǵynan aıyrý jazasy qarastyrylǵan.
Basqosýda Qoǵamdyq damý isteri basqarmasynyń basshysy Talǵat Rahmanberdi jarnama agenttikterine 2020 jyldyń 3 naýryzyna deıin jarnama nysanynyń estetıkalyq túrin qalpyna keltirý, sondaı-aq, «Jarnama týraly», «Til týraly» zańdardy, QR basqa da normatıvtik aktilerin saqtaý kerektigin aıtyp ótti.