Elordada Syr óńiriniń jármeńkesi ótip jatyr

NUR-SULTAN. QazAqparat - 10-11 qyrkúıek kúnderi Nur-Sultan qalasynda «Astana Arena» sporttyq kesheniniń janynda Qyzylorda oblysynyń aýyl sharýashylyǵy ónimderiniń jármeńkesi ótýde, dep habarlaıdy QazAqparat.

Sharaǵa Aýyl sharýashylyǵy vıtse-mınıstri Ábilhaıyr Tamabek pen Qyzylorda oblysy ákiminiń birinshi orynbasary Serik Qojanııazov arnaıy baryp qatysty.

Jármeńkede aımaqta óndiriletin otandyq ónimderdi qoldaý maqsatynda arnaıy aýyl sharýashylyǵy ónimderiniń kórmesi uıymdastyrylǵan.

Syrdyń dıhandary men kásiporyndary 50 júk avtokóligimen jalpy quny 200 mln teńgeni quraıtyn 500 tonnadan astam ónim túrlerin elordaǵa jetkizdi. Onyń ishinde 100 tonna kúrish, 15 tonna et jáne 30 tonna balyq ónimderi, 80 tonna kókónis pen jemis-jıdekter, 210 tonna baqsha ónimderi, 50 tonna asqabaq, 3 tonna as tuzy, 10 tonna sút ónimderi, 5 tonnaǵa jýyq kondıter ónimderi qoıylǵan.

Jármeńkege kelýshiler Qyzylorda oblysynyń brendine aınalǵan aq kúrishi men balyǵyn, as tuzy, qaýyny men qarbyzyn qyzyǵýshylyqpen alyp jatyr.

Al, Syr elinen kelgen ónerpazdar ánnen shashý shashyp, elordalyqtarǵa kóterińki kóńil-kúı syılaýda.

Jármeńke aıasynda Qyzylorda oblysy ákimdiginiń bastamasymen qaıyrymdylyq sharasy uıymdastyrylyp, kómekke muqtaj otbasylarǵa azyq-túlik sebetterin taratty.

«Aımaqtyń agrarlyq salasy el ekonomıkasynyń damýyna ózindik úlesin qosyp keledi. Jalpy, bıylǵy jyly 188,5 myń gektar jerge aýyl sharýashylyǵy daqyldary ornalastyrylsa, onyń ishinde dándi daqyldar - 91,7 myń gektardy, maıly daqyldar - 5,9 myń gektardy, mal azyqtyq daqyldar - 71,3 myń gektardy, kartop, kókónis, baqsha – 19,6 myń gektardy, negizgi daqyl kúrishtiń kólemi 78,6 myń gektardy qurady. Qazir Syr elinde kúrishke oraq salynyp, egin jınaý naýqany qarqyndy júrýde. Sondaı-aq, oblysta 228,4 myń tonna kartop, kókónis, baqsha jáne 20,6 myń tonna et, 50,2 myń tonna sút óndirilip otyr. Mine búgin óńir sharýalarynyń óndirgen ónimderin Elorda jurtyna ákelip otyrmyz», - dedi oblys ákiminiń birinshi orynbasary Serik Qojanııazov.

Búginde Syr eliniń aýyl sharýashylyǵy ónimderi álemniń 20 memleketine eksporttalýda.

Eksporttalǵan ónimniń 91,8 paıyzy oblystyń negizgi daqyly - kúrish ónimi bolsa, bul ónimder Reseı, Belarýs, Qyrǵyzstan, Ázirbaıjan, Ózbekstan, Mońǵol memleketi, Tájikstan, Túrkmenııa, Ýkraına, Grýzııa, Lıtva, Túrkııa jáne Irak memleketterine jóneltilýde.