Elordada sý basýy múmkin 25 ýchaske anyqtaldy

NUR-SULTAN. QazAqparat - Nur-Sultan qalasy boıynsha sý basý qaýpi bar ýchaskeler anyqtalyp, jaǵdaı baqylaýǵa alyndy. Bul týraly qalalyq tótenshe jaǵdaılar departamenti tótenshe jaǵdaılardyń aldyn alý basqarmasynyń basshysy Baýyrjan Beısenqanov málim etti, dep habarlaıdy QazAqparat tilshisi.

«Elordadaǵy sý tasqyny jaǵdaıy máselesi erekshe baqylaýda. Tótenshe jaǵdaıdyń aldyn alý úshin 1 sáýirde qalalyq jedel shtab quryldy. Sonymen qatar aýdandyq ákimdikterde sý tasqynyna qarsy komıssııalar jumys isteıdi, qar, aryq jáne nóser jelilerin tazalaý boıynsha keń aýqymdy profılaktıkalyq jumys júrip jatyr. 4 sáýirdegi jaǵdaı boıynsha qalada jalpy uzyndyǵy 53,7 shaqyrym bolatyn aryq tazalandy. Qazirgi ýaqytta elorda aýmaǵynda sý tasýy múmkin degen 25 ýchaske belgilendi», - dedi Baýyrjan Beısenqanov elorda ákimdiginde onlaın ótken baspasóz máslıhatynda.

Atap aıtqanda, Almaty aýdany boıynsha – 7 ýchaske, Baıqońyr – 5, Esil – 9 jáne Saryarqa aýdanynda – 4 ýchaske.

Sondaı-aq, basqarma basshysy tótenshe jaǵdaıǵa mamandar men tehnıkanyń daıyn ekenin jetkizdi.

«Sý tasqyny qaýpi bar ýchaskelerde 169 maman, 103 tehnıka, 34 motopompa men 2 ınjenerlik jáne sý aıdaý qaıyǵy daıyn. Turǵyndardyń ótinishterin 112 nómirli qutqarý jáne «Ikomek» qyzmeti qabyldaıdy. Sý basý týraly habar kelip túsken jaǵdaıda mamandar oqıǵa ornyna jedel túrde jetedi», - deıdi ol.

Odan bólek, TJD ókili sý tasqynyna qarsy is–sharalar aıasynda shshamamen 10 000 tonna ınertti materıaldyń (7300 dana qap) daıyn turǵanyn jetkizdi.

Onyń ishinde 9300 tonna usaq tas, 155 tonna qum jáne 500 tonna qum-tuz qospasy bar.