Elordada stıhııalyq polıgondardan 160 myń tonnadan astam qoqys shyǵaryldy

<p>ASTANA. KAZINFORM &ndash; Elordada stıhııalyq ruqsat etilmegen polıgondarmen júıeli kúres jalǵasýda. 2024 jyldyń basynan bastap elordanyń bes aýdanynda ruqsat etilmegen polıgondardyń 221 orny anyqtaldy. Olardan polıgondarǵa 160 myń tonnadan astam qoqys shyǵaryldy, dep habarlaıdy Astana ákimdiginiń resmı saıty.</p>

Kún saıyn qalanyń barlyq aýdanynda ruqsat etilmegen polıgondardyń bolýyna monıtorıng júrgiziledi.

Mysaly, Almaty aýdany boıynsha 115 ýchaske joıylyp, 55 myń tonnaǵa jýyq qoqys (shamamen 8 myń reıs) shyǵaryldy.

Baıqońyr aýdanynda 10 ýchaske joıylyp, olardan 8 myń tonnaǵa jýyq qoqys shyǵaryldy.

Esil aýdany boıynsha 18 oryn joıylyp, polıgonǵa 20 myń tonnaǵa jýyq qoqys jóneltildi.

Saryarqa aýdany boıynsha 39 stıhııalyq qoqys orny anyqtalyp, olardan 38 myń tonnaǵa jýyq qoqys shyǵaryldy. Jumys jalǵasýda.

Nura aýdanynda joıylǵan 39 orynnan 40 myń tonna qoqys shyǵaryldy.

Astanada ruqsat etilmegen qoqys úıindilerinen qoqys jınaýǵa arnalǵan qalalyq QTQ polıgonynyń janynda ýaqytsha alań belgilendi, ol Alash, 64 tas jolynda ornalasqan.
IKomek arqyly qurylys alańdarynan qoqysty shyǵarý jáne ruqsat etilmegen oryndarǵa shyǵarý faktileri belgilenedi, quqyq qorǵaý organdarymen birlesip reıdtik is-sharalar júrgiziledi.

Jyl basynan beri jalpy paıdalaný oryndaryn lastaǵany úshin jalpy somasy 136 mln teńgeden asatyn 9 myńǵa jýyq quqyq buzýshyǵa aıyppul salyndy. Sonymen qatar, qoqysty ruqsatsyz tastaǵany úshin 161 júk kóliginiń júrgizýshisi ákimshilik jaýapkershilikke tartylyp, 5 mln 200 myń teńgeden astam somaǵa aıyppul salyndy.

Zańsyz polıgondardy joıý jumysy jalǵasýda. Onyń ishinde jańa oshaqtardyń paıda bolýyna jol bermeý boıynsha sharalar qabyldanyp jatyr.

Esterińizge sala keteıik, «Taza Qazaqstan. Astana – tazalyq pen tártiptiń úlgisi» aktsııasy aıasynda qalany sanıtarlyq tazartý, nóser jáne aryq kárizderin tazartý, kóshelerdi, trotýarlardy, kvartalishilik aýmaqtardy, qoǵamdyq keńistikter men aýlalardy tazalaý júrgizilýde.

Sondaı-aq jasyl jelekterdi kútip ustaý jáne otyrǵyzý, saýda nysandaryna irgeles aýmaqtardy jınaý, ruqsat etilmegen polıgondardy joıý jáne t.b. jumystar júrgizilýde.

Sonymen qatar, elordada Taza Astana jańa áleýmettik jobasy iske qosyldy. Joba quqyqtyq tártip, abattandyrý, kógaldandyrý, sanıtarlyq tazalaý, kóppáterli turǵyn úılerdiń, úı janyndaǵy, kvartalishilik jáne aýla aýmaqtarynyń kirme toptarynyń tazalyǵy máseleleri boıynsha júıeli jumys isteýge baǵyttalǵan.